دوسرا ٹی-20: ہندوستان کی سری لنکا پر 7 وکٹ سے جیت، 3 میچوں کی سیریز میں 2-0 کی ناقابل تسخیر برتری

نئی دہلی: دھرم شالہ میں کھیلے گئے ٹی-20 میچ میں ہندوستان نے سری لنکا کو بہت آسانی سے شکست دے دی۔ ایک وقت میں ٹیم انڈیا کے لیے مشکل صورتحال پیدا ہو رہی تھی لیکن شریئس ایئر اور رویندر جڈیجہ کی بلے بازی کے بل بوتے پر ہندوستان نے ہدف حاصل کر لیا۔ ہندوستان نے سیریز میں لگاتار دوسرا میچ جیت کر سیریز بھی اپنے نام کر لی۔

سری لنکا نے ہندوستان کو 184 رنز کا ہدف دیا تھا، جس کے تعاقب میں ٹیم انڈیا کو شروع میں ہی جھٹکا لگا لیکن شریئس ایئر اور سنجو سیمسن کے درمیان پہلے 84 رنز کی شراکت اور بعد میں رویندر جڈیجہ کی طوفانی اننگز نے میچ کو یکطرفہ کر دیا۔ ٹیم انڈیا کے پہلے دو وکٹ پانچ اوور میں گر گئے تھے، ایسے میں ہدف حاصل کرنا مشکل ہونے لگا تھا لیکن شریئس اور سنجو سیمسن بہترین کارکردگی کا مظاہرہ کیا۔ دونوں نے پہلے شراکت قائم کی اور پھر رنز کی بارش شروع کر دی۔ آخر میں ہندوستان نے یہ میچ 7 وکٹوں سے جیت لیا۔ ٹیم انڈیا نے تین اوور بقیہ رتے ہوئے ہی میچ ختم کر دیا۔

شریئس ایئر اور سنجو سیمسن نے صرف 47 گیندوں میں 84 رنز کی شراکت داری کی۔ اپنی اننگز میں سنجو سیمسن نے صرف 25 گیندوں میں 39 رنز جبکہ شریئس ایئر نے 44 گیندوں میں 74 رنز بنائے۔

قبل ازیں، سری لنکا کا آغاز کچھ خاص نہیں تھا اور اس نے شروعاتی 11 اوورز میں صرف 76 رنز بنائے لیکن آخری پانچ اوورز میں سری لنکا نے تقریباً 80 رنز بنائے اور اپنا سکور 183 تک پہنچا دیا۔ سری لنکا کے کپتان داسن شناکا آخر میں آئے اور صرف 19 گیندوں پر 47 رنز بنائے۔ اس سے قبل پتھم نسانکا نے صرف 53 گیندوں میں 75 رنز بنائے تھے۔ ہندوستان کے لیے ہرشل پٹیل نے اپنے چار اوورز میں 52 رنز دیے۔