روہت شرما یک روزہ کرکٹ رینکنگ میں پہلی بار بنے نمبر 1، سڈنی میں سنچری بنانے کا ملا فائدہ

ہندوستانی کرکٹ ٹیم کے سابق کپتان روہت شرما آئی سی سی کے ذریعہ جاری تازہ یک روزہ بین الاقوامی رینکنگ میں نمبر 1 مقام پر پہنچ گئے ہیں۔ روہت شرما نے آسٹریلیا کے خلاف سڈنی میں کھیلے گئے تیسرے یک روزہ میچ میں ناٹ آؤٹ سنچری بنائی تھی، جس کا انھیں زبردست فائدہ ملا ہے۔ اس کے ساتھ ہی روہت شرما 38 سال 182 دن کی عمر میں یک روزہ کرکٹ رینکنگ میں نمبر 1 بلے باز بننے والے ہندوستان کے سب سے عمر دراز کھلاڑی بن گئے ہیں۔

قابل ذکر ہے کہ ہندوستان کے مایہ ناز تجربہ کار بلے باز روہت شرما نے کئی مہینوں بعد آسٹریلیا کے خلاف حال ہی میں ختم ہوئی 3 میچوں کی یک روزہ سیریز سے ہندوستانی جرسی میں واپسی کی تھی۔ روہت آسٹریلیا دورے سے قبل ہندوستان کے لیے آخری بار رواں سال چمپئنز ٹرافی کے فائنل میں کھیلے تھے۔ انھوں نے 223 دنوں بعد بین الاقوامی کرکٹ میں واپسی کی۔ پرتھ میں کھیلے گئے پہلے یک روزہ میچ میں روہت کچھ خاص نہیں کر سکے تھے، لیکن اگلے 2 میچوں میں وہ پرانے رنگ میں دکھائی دیے۔ روہت اس دوران یک روزہ کرکٹ میں ہندوستان کے لیے سب سے زیادہ رن بنانے والے تیسرے بلے باز بن گئے تھے۔

آسٹریلیا میں بہترین مظاہرہ سے روہت کی رینکنگ میں زبردست فائدہ پہنچا۔ پہلے وہ تیسرے نمبر پر تھے، لیکن اب 2 مقام کی بہترین کے ساتھ نمبر 1 پر پہنچ گئے ہیں۔ یہ پہلی مرتبہ ہے جب روہت شرما آئی سی سی کی یک روزہ رینکنگ میں پہلے مقام پر پہنچے ہیں۔ روہت نے یک روزہ کرکٹ میں ہندوستانی کپتان شبھمن گل کو بھی پیچھے چھوڑ دیا۔ پچھلے ہفتہ روہت کے 745 ریٹنگ پوائنٹس تھے، لیکن انھوں نے آسٹریلیا کے خلاف دوسرے یک روزہ کرکٹ میں 73 رن، اور تیسرے میچ میں ناٹ آؤٹ 121 رنوں کی اننگ کھیلی۔ لگاتار 2 میچوں میں بڑی اننگ کی بدولت ان کے 781 ریٹنگ پوائنٹس ہو گئے۔ اب گل پہلے مقام سے تیسرے مقام پر کھسک گئے ہیں، جبکہ افغانستان کے ابراہیم زادران دوسرے نمبر پر برقرار ہیں۔ تیسرے میچ میں زخمی ہوئے شریئس ایئر بھی ایک پوزیشن کی بہترین کے ساتھ تازہ رینکنگ میں نویں مقام پر آ گئے ہیں۔