راجستھان رائلزنے ہسرنگا کے بل بوتے پہلی جیت درج کی

آئی پی ایل میں اتوار کو کھیلے گئے ڈبل ہیڈر کے دوسرے میچ میں راجستھان رائلز نے چنئی سپر کنگز کو 6 رنز سے شکست دے دی۔ راجستھان رائلز نے پہلے بیٹنگ کرتے ہوئے 182 رنز بنائے۔ جواب میں چنئی سپر کنگز 20 اوورز میں صرف 176 رنز بنا سکی۔ ایم ایس دھونی آج صحیح وقت پر آئے، اور ایسا لگ رہا تھا کہ وہ میچ جیت جائیں گے لیکن ایسا نہیں ہوا۔

183 رنز کے تعاقب میں چنئی سپر کنگز یعنی  سی ایس کے کی شروعات خراب رہی۔ ان فارم بلے باز راچن رویندرا کو پہلے ہی اوور میں جوفرا آرچر نے صفر پر آؤٹ کیا۔ اس کے بعد راہل ترپاٹھی نے رتوراج گائیکواڑ کے ساتھ مل کر 46 رنز کی شراکت داری کی۔ ترپاٹھی 19 گیندوں میں 23 رنز بنانے کے بعد وینندو ہسرنگا کے ہاتھوں کیچ آؤٹ ہوئے۔

امپیکٹ کھلاڑی کے طور پر آنے والے شیوم دوبے 10 گیندوں پر 18 رنز بنانے کے بعد ونیندو ہسرنگا کے ہاتھوں آؤٹ ہوئے، اس مختصر اننگز میں انہوں نے 2 چھکے اور 1 چوکا لگایا۔ لیکن ان کی وکٹ کے بعد سی ایس کے پر دباؤ بڑھنے لگا۔ اس کے بعد وجے شنکر بھی 9 رنز بنانے کے بعد ونیندو ہسرنگا کی گیند پر بولڈ ہوگئے۔ اگرچہ کپتان رتوراج گائیکواڑ نے 63 رنز کی عمدہ اننگز کھیلی لیکن وہ بھی ہسرنگا کا شکار بنے۔ 44 گیندوں میں 63 رنز کی اپنی اننگز میں رتوراج نے 7 چوکے اور 1 چھکا لگایا۔ 16ویں اوور میں رتوراج کے آؤٹ ہونے کے بعد ایم ایس دھونی کریز پر آئے، تب ایسا لگا کہ وہ آج کا میچ جیت جائیں گے۔ اس وقت سی ایس کے کو جیت کے لیے 25 گیندوں میں 54 رنز درکار تھے۔

چنئی کو آخری اوور میں جیت کے لیے 20 رنز درکار تھے، ایم ایس دھونی اسٹرائیک پر تھے اور سندیپ شرما بولنگ کر رہے تھے۔ وائیڈ کے بعد ایم ایس دھونی پہلی گیند پر کیچ آؤٹ ہو گئے اور مداحوں کا دل ٹوٹ گیا۔ دھونی نے 11 گیندوں میں 16 رنز بنائے۔ رویندرا جڈیجہ بھی اہم اوقات میں بڑے شاٹس لگانے میں ناکام رہے جس کی وجہ سے ہدف مزید دور چلا گیا۔ جڈیجہ نے 22 گیندوں میں 32 رنز بنائے۔

بلے سے فلاپ ہونے والے وینندو ہسرنگا نے راجستھان رائلز کے لیے شاندار اسپیل کیا۔ انہوں نے 4 اوورز کے دوران 35 رنز دے کر 4 وکٹیں حاصل کیں۔ جوفرا آرچر کا اسپیل بھی شاندار تھا، انہوں نے 3 اوورز میں صرف 13 رنز دے کر 1 وکٹ حاصل کی۔ سندیپ شرما نے 4 اوور میں 42 رن دے کر 1 وکٹ حاصل کی۔

راجستھان رائلز نے پہلے بلے بازی کرتے ہوئے 182 رنز بنائے۔ پہلے ہی اوور میں یشسوی جیسوال کی شکل میں وکٹ گرنے کے بعد نتیش رانا نے شاندار اننگز کھیلی۔ انہوں نے 36 گیندوں پر 81 رنز کی شاندار اننگز کھیلی۔ اس میں انہوں نے 5 چھکے اور 10 چوکے لگائے۔

تاہم آخری 8 اوورز میں چنئی سپر کنگز نے راجستھان کو رن ریٹ میں اضافہ کرتے ہوئے اور مسلسل وکٹیں لے کر 182 رنز تک محدود کر دیا۔ 12 اوورز کے بعد راجستھان رائلز کا اسکور 129 رنز تھا جس کے 7 وکٹ باقی تھے۔ راجستھان نے آخری 8 اوور میں صرف 53 رن بنائے تھے۔خلیل احمد، متھیشا پتھیرانا اور نور احمد نے 2،2 وکٹیں حاصل کیں۔ پتھیرانا اور نور احمد نے اپنے سپیل میں 28-28 رنز دیے۔ رویندرا جڈیجہ اور اشون نے ایک ایک وکٹ حاصل کی۔