پاکستان نے ایشیا کپ رائزنگ اسٹارز کا خطاب جیت لیا، سپر اوور میں بنگلہ دیش کے خلاف سنسنی خیز فتح

پاکستان نے فائنل میں بنگلہ دیش کو شکست دے کر ایشیا کپ رائزنگ اسٹارز 2025 کا خطاب جیت لیا۔ پاکستان نے سپر اوور میں جانے والے میچ میں بنگلہ دیش کے خلاف سنسنی خیز فتح درج کی۔ بنگلہ دیش نے سپر اوور میں 7 رنز کا ہدف پاکستان کو  دیا جسے پاکستانی بلے بازوں نے صرف چار گیندوں پر حاصل کر لیا۔ دونوں ٹیموں کی اننگز 125 رنز پر ختم ہوئی جس کے بعد پاکستان نے سپر اوور میں سنسنی خیز فتح حاصل کرکے ایشیا کپ رائزنگ اسٹارز کا خطاب اپنے نام کرلیا۔

بنگلہ دیش سپر اوور میں صرف چھہ  رنز بنا سکا۔ بنگلہ دیش نے تین گیندوں کے اندر اپنی دونوں وکٹیں گنوا دیں۔ پاکستانی بلے بازوں نے پہلی دو گیندوں پر سنگل لیا، پھر تیسری گیند پر چوکا لگایا اور پھر چوتھی گیند پر ایک رن دوڑ کر فتح کو یقینی بنایا۔

اس فائنل میچ میں بنگلہ دیش اے ٹیم نے ٹاس جیت کر پہلے گیند بازی کا فیصلہ کیا۔ ان کا فیصلہ درست ثابت ہوا، کیونکہ پاکستان 125 رنزہی بنا سکی ۔ پاکستان کے لیے صرف معاذ صداقت (28)، عرفات منہاس (25) اور سعد مسعود (38) ڈبل فیگرز تک پہنچے۔ بنگلہ دیش کی جانب سے رپن مونڈل نے تین اور رقیب الحسن نے دو وکٹیں حاصل کیں۔

جب بنگلہ دیش بیٹنگ کے لیے آیا تو اس کے بغیر کوئی وکٹ کھوئے 22 رنز تھے لیکن وہیں سے وکٹوں کے گرنے کا سلسلہ شروع ہوا، بنگلہ دیش نے اگلے 31 رنز کے اندر سات وکٹیں گنوا دیں۔ پاکستان کی جیت تقریباً یقینی دکھائی دے رہی تھی لیکن رقیب الحسن اور ایس ایم مہروب نے 37 رنز کی شراکت سے میچ میں جوش و خروش بڑھا دیا۔

96 کےا سکور پر رقیب الحسن 24 رنز بنا کر آؤٹ ہوئے تو ایسا لگ رہا تھا کہ بنگلہ دیش کی شکست یقینی ہے۔ لیکن رپن مونڈل اور عبدالغفار ثقلین نے ہار ماننے سے انکار کر دیا اور 29 رنز کی شراکت قائم کر کے میچ برابر کر دیا۔ اس کے نتیجے میں دونوں ٹیمیں 125-125 پر برابر ہوگئیں جس کے بعد سپر اوور ہوا اور پاکستان سپر اوور میں جیت گیا۔