گوتم گمبھیر لاپتہ: ’آخری مرتبہ اندور میں جلیبی کھاتے نظر آئے تھے‘

دہلی میں بی جے پی کے رکن پارلیمنٹ گوتم گمبھیر کے لاپتہ ہونے کے پوسٹر لگائے گئے ہیں۔ پوسٹروں میں لکھا ہے، ’’کیا آپ نے انہیں دیکھا ہے؟ آخری بار انہیں اندور میں جلیبی کھاتے دیکھا گیا تھا۔ پوری دہلی انہیں ڈھونڈ رہی ہے۔‘‘

واضح رہے کہ گوتم گمبھیر 15 نومبر کو دہلی میں فضائی آلودگی سے متعلق شہری ترقی کی پارلیمانی اسٹینڈنگ کمیٹی کے اجلاس میں شریک نہیں ہوئے تھے، جس کے بعد پارلیمانی کمیٹی کا اجلاس ملتوی کردیا گیا تھا۔ خاص بات یہ کہ 29 ارکان پارلیمنٹ پارلیمانی کمیٹی کے ممبران ہیں لیکن اجلاس میں صرف 4 ممبران پارلیمنٹ ہی پہنچے تھے۔ ایم سی ڈی کے تین کمشنر، ڈی ڈی اے کے وائس چیئرمین اور وزارت ماحولیات میں جوائنٹ سکریٹری بھی اس اجلاس میں شریک نہیں ہوئے۔ متعدد سینئر عہدیداروں کے اجلاس میں نہ پہنچنے کی وجہ سے 15 نومبر کے اجلاس کو ملتوی کر دینا پڑا۔ یہ اجلاس اب 20 نومبر کو ہو سکتا ہے۔

مشرقی دہلی سے بی جے پی کے رکن پارلیمنٹ اور سابق کرکٹر گوتم گمبھیر شہری ترقی کی پارلیمانی اسٹینڈنگ کمیٹی کے آلودگی پر ہونے والے اجلاس سے غیر حاضر رہے تھے، جس کے بعد سے ان پر شدید تنقید کی جا رہی ہے۔ سوشل میڈیا پر بھی وہ لوگوں کے نشانہ پر ہیں۔ لوگوں نے کہا کہ پوری دہلی آلودگی سے لڑ رہی ہے اور گوتم گمبھیر اس مسئلے پر دہلی میں ایک اہم اجلاس میں شرکت کرنے کی بجائے اندور میں جلیبی سے لطف اندوز ہو رہے ہیں۔

دہلی میں حکمران عام آدمی پارٹی نے بھی گوتم گمبھیر پر حملہ کیا اور ان پر سخت تنقید کی۔ وزیر سوربھ بھاردواج نے ٹوئٹ کیا، ’’بی جے پی نے آلودگی کی روک تھام کے لئے پارلیمانی کمیٹی کا اجلاس طلب کیا۔ ایم سی ڈی کے کمشنرز اور ڈی ڈی اے کے وی سی وہاں نہیں گئے۔ رکن پارلیمنٹ گوتم گمبھیر بھی صرف ٹوئٹر پر درس دیتے ہیں لیکن وہ اس میٹنگ میں شریک نہیں ہوتے ہیں۔‘‘