آئی پی ایل 2026: چنئی کی ٹیم 209 رن بنا کر بھی ہار گئی، پنجاب کو 5 وکٹوں سے ملی فتح

آئی پی ایل 2026 کے ساتویں میچ میں پنجاب کنگز نے چنئی سپر کنگز کے ہوم گراؤنڈ ایم اے چدمبرم اسٹیڈیم میں سنسنی خیز جیت درج کی۔ ٹاس ہار کر پہلے بلے بازی کرنے اتری چنئی نے 20 اوور میں 209 رنوں کا مضبوط اسکور کھڑا کیا، لیکن پنجاب کنگز نے ہدف کا تعاقب کرتے ہوئے 18.4 اوور میں 210 رن بنا کر میچ 5 وکٹ سے جیت لیا۔ اس دوران پریانش آریہ، پربھسمرن سنگھ، کوپر کونلی اور کپتان شریئس ایئر نے شاندار اننگز کھیلیں۔

چنئی سپر کنگز کے بلے باز بھی اس میچ میں شاندار کارکردگی پیش کرنے میں کامیاب ہوئے، لیکن اس کے گیندباز اسکور کا دفاع نہیں کر پائے۔ چنئی کے نوجوان بلے باز آیوش مہاترے نے 73 رنوں کی شاندار اننگ کھیلی۔ ان کے علاوہ شیوم دوبے نے ناٹ آؤٹ 45 رن بنائے اور سرفراز خان نے 12 گیندوں پر 32 رنوں کی طوفانی اننگ کھیل کر ٹیم کو 200 کے پار پہنچایا۔ پنجاب کی جانب سے وجے کمار ویشاک نے سب سے زیادہ 2 وکٹ حاصل کیے۔ زیویئر بارٹلیٹ، مارکو یانسن اور یجویندر چہل کو 1-1 کامیابی ملی۔

پنجاب کنگز کا تعاقب کافی جارحانہ رہا۔ سلامی بلے باز پربھسمرن سنگھ اور پریانش آریہ نے اچھی شروعات دیتے ہوئے 61 رنوں کی شراکت داری کی۔ پریانش آریہ نے صرف 11 گیندوں پر 39 رن بنا کر ٹیم کو آغاز میں ہی برتری دلا دی۔ پربھسمرن بھی 34 گیندوں پر 43 رن بنانے میں کامیاب رہے۔ اس کے بعد کوپر کونلی نے 22 گیندوں پر 36 رن کی اہم اننگ کھیلی۔ کپتان شریئس ایئر نے بھی ایک اہم اننگ کھیلی اور 29 گیندوں پر 50 رن بنائے، جس میں 4 چوکے اور 3 چھکے شامل رہے۔

پنجاب کنگز کے لیے یہ جیت کئی لحاظ سے خاص رہی۔ انہوں نے دوسری بار ایم اے چدمبرم اسٹیڈیم میں 200 رنوں کا ہدف حاصل کیا۔ پنجاب کی ٹیم یہ کارنامہ انجام دینے والی پہلی ٹیم ہے۔ اس سے پہلے کوئی بھی ٹیم چنئی کے خلاف اس کے ہوم گراؤنڈ پر 2 بار 200 رنوں کا ہدف حاصل نہیں کر سکی تھی۔