ہندوستانی سلامی بلے باز ابھشیک شرما نے ٹی20 میں سب سے کم گیندوں میں پورے کیے 1000 رن، بچ گیا کوہلی کا ریکارڈ

ہندوستانی ٹیم کے طوفانی سلامی بلے باز ابھشیک شرما نے ٹی20 بین الاقوامی کرکٹ میں ایک بڑا ریکارڈ اپنے نام کر لیا ہے۔ انھوں نے محض 528 گیندوں میں اپنے 1000 ٹی20 بین الاقوامی رن پورے کر لیے ہیں۔ یہ کسی بھی فل ممبر (سرکردہ دس ٹیمیں) ٹیم کے بلے باز کے لیے سب سے تیز رن ہیں۔ اس معاملے میں انھوں نے سوریہ کمار یادو (573 گیند) اور فل سالٹ (599 گیند) جیسے مایہ ناز بلے بازوں کو پیچھے چھوڑ دیا۔

آج آسٹریلیا کے خلاف کھیلے جا رہے ٹی20 مقابلے میں ہندوستانی بلے باز ابھشیک شرما نے مزید ایک کامیابی حاصل کی۔ انھوں نے ہندوستانی بلے بازوں میں سب سے کم اننگز میں 1000 رن پورے کرنے کے معاملے میں دوسرا مقام حاصل کر لیا ہے۔ انھوں نے یہ مقام محض 28 اننگز میں حاصل کیا۔ ان سے آگے صرف وراٹ کوہلی ہیں، جنھوں نے 27 اننگز میں یہ کارنامہ انجام دیا تھا۔ کے ایل راہل نے یہ کارنامہ 29 اننگز میں اور سوریہ کمار یادو نے 31 اننگز میں انجام دیا تھا۔

ابھشیک شرما نے آسٹریلیا کے خلاف پانچویں اور آخری ٹی20 مقابلے میں 11 رن بناتے ہی یہ کامیابی حاصل کر لی تھی۔ اس دوران ابھشیک کو دو زندگیاں بھی ملی تھیں۔ ابھشیک کو دونوں زندگیاں شروعاتی چار اوورس کے اندر ہی ملے۔ پہلے اوور کی چوتھی گیند پر ابھشیک نے بہترین چوکا لگایا، اس کے بعد اگلی گیند پر وہ پھر بڑے شاٹ کے لیے گئے۔ یہ گیند زیادہ دور جانے کی جگہ اونچی گئی اور مڈ آف پر کھڑے میکسویل کے پاس پہنچی، لیکن گیند ان کے ہاتھ سے چھٹک کر نیچے گر گئی۔ اس طرح ابھشیک کو پہلی زندگی ملی۔ اس کے بعد چوتھے اوور میں ناتھن ایلس کی گیند پر ابھشیک نے فائن لیگ پر شاٹ کھیلا، لیکن گیند ڈوارشوئس کے ہاتھوں سے چھٹک گئی۔ اس وقت ابھشیک 11 رنوں پر تھے۔