ٹی-20 ورلڈ کپ: نیوزی لینڈ کو 96 رن سے شکست دے کر ہندوستان نے تیسری بار جیتی ٹرافی

احمد آباد: ہندوستانی کرکٹ ٹیم نے ٹی-20 ورلڈ کپ 2026 کا خطاب اپنے نام کرتے ہوئے تاریخ رقم کر دی۔ احمد آباد کے نریندر مودی کرکٹ اسٹیڈیم میں کھیلے گئے فائنل مقابلے میں ہندوستان نے نیوزی لینڈ کو 96 رن کے بڑے فرق سے شکست دے کر ٹورنامنٹ کا تیسرا خطاب جیت لیا۔ اس شاندار کامیابی کے ساتھ ہی ہندوستان ٹی-20 ورلڈ کپ کو تین بار جیتنے والی ٹیم بن گئی، جبکہ مسلسل دوسری مرتبہ یہ ٹرافی اپنے نام کرنے والی دنیا کی پہلی ٹیم بھی بن گئی۔

ہندوستان نے پہلے بیٹنگ کرتے ہوئے مقررہ 20 اوور میں 5 وکٹ کے نقصان پر 255 رن کا بڑا اسکور کھڑا کیا۔ جواب میں نیوزی لینڈ کی پوری ٹیم 19 اوور میں 159 رن بنا کر آل آؤٹ ہو گئی۔ اس طرح ہندوستان نے یک طرفہ مقابلے میں 96 رن سے کامیابی حاصل کی۔

ہدف کا تعاقب کرنے اتری نیوزی لینڈ کی شروعات اچھی نہیں رہی۔ سیمی فائنل میں شاندار سنچری بنانے والے فن ایلن اس بار صرف 9 رن بنا کر اکشر پٹیل کا شکار بن گئے۔ جلد ہی رچن رویندر بھی محض ایک رن بنا کر پویلین لوٹ گئے۔ اس کے بعد گلین فلپس بھی زیادہ دیر وکٹ پر نہ ٹھہر سکے اور صرف 5 رن بنا کر آؤٹ ہو گئے۔ مارک چیپمین کو ہاردک پانڈیا نے صرف 3 رن کے اسکور پر واپس بھیج دیا۔

نیوزی لینڈ کی امیدیں ڈیرل مچل سے وابستہ تھیں مگر ان کی خراب فارم فائنل میں بھی برقرار رہی اور وہ صرف 17 رن بنا سکے۔ ایک جانب وکٹیں گرتی رہیں، تاہم ٹم سیفرٹ نے جارحانہ بیٹنگ کرتے ہوئے ٹیم کو سنبھالنے کی کوشش کی۔ سیفرٹ نے 26 گیندوں میں 52 رن کی تیز رفتار اننگز کھیلی، جس میں دو چوکے اور پانچ چھکے شامل تھے مگر وہ بھی زیادہ دیر وکٹ پر نہ رہ سکے اور ورون چکرورتی کی گیند پر ایشان کشن کے ہاتھوں کیچ آؤٹ ہو گئے۔

جیمس نیشم صرف 8 رن بنا سکے جبکہ میٹ ہینری کھاتہ کھولے بغیر آؤٹ ہو گئے۔ کپتان مچل سینٹنر نے 35 گیندوں میں 43 رن بنا کر کچھ مزاحمت ضرور دکھائی لیکن دوسری جانب سے وکٹوں کا سلسلہ جاری رہا اور پوری ٹیم 159 رن پر ڈھیر ہو گئی۔

ہندوستان کی جانب سے گیند بازی میں جسپریت بمراہ نے شاندار کارکردگی پیش کی۔ انہوں نے چار اوور میں صرف 15 رن دے کر چار اہم وکٹ حاصل کیے اور نیوزی لینڈ کی بیٹنگ لائن کو بکھیر کر رکھ دیا۔ اکشر پٹیل نے بھی مؤثر گیند بازی کرتے ہوئے 27 رن دے کر تین وکٹ لیے، جبکہ ہاردک پانڈیا اور ورون چکرورتی نے ایک ایک وکٹ اپنے نام کی۔

اس سے قبل ٹاس ہار کر پہلے بیٹنگ کرنے اتری ہندوستانی ٹیم کو ابھیشیک شرما اور سنجو سیمسن نے دھماکے دار آغاز فراہم کیا۔ دونوں بلے بازوں نے پہلے وکٹ کے لیے صرف 7.1 اوور میں 98 رن کی شراکت قائم کی۔ ابھیشیک شرما نے جارحانہ انداز میں کھیلتے ہوئے 21 گیندوں پر 52 رن بنائے، جس میں کئی شاندار باؤنڈریاں شامل تھیں۔

سنجو سیمسن نے فائنل میں یادگار اننگز کھیلتے ہوئے 46 گیندوں میں 89 رن بنائے۔ انہوں نے اپنی اننگز میں 5 چوکے اور 8 چھکے لگائے اور اس کے ساتھ ہی ٹی-20 ورلڈ کپ کے فائنل میں سب سے بڑی انفرادی اننگز کھیلنے والے بلے باز بن گئے۔

نمبر تین پر بیٹنگ کے لیے آنے والے ایشان کشن نے بھی تیز رفتار اننگز کھیلی۔ انہوں نے صرف 25 گیندوں میں 54 رن بنائے اور 216 کے شاندار اسٹرائیک ریٹ سے کھیلتے ہوئے چار چوکے اور چار چھکے لگائے۔ اگرچہ کپتان سوریہ کمار یادو بغیر کھاتہ کھولے آؤٹ ہو گئے اور ہاردک پانڈیا بھی صرف 18 رن بنا سکے۔

آخر میں شیوم دوبے نے صرف آٹھ گیندوں میں ناٹ آؤٹ 26 رن بنا کر ٹیم کے اسکور کو 255 تک پہنچانے میں اہم کردار ادا کیا۔ یہ ٹی 20 ورلڈ کپ کے ناک آؤٹ مرحلے میں بنایا گیا سب سے بڑا اسکور بھی ثابت ہوا۔

اس طرح ہندوستان نے شاندار بیٹنگ اور مؤثر گیند بازی کی بدولت نیوزی لینڈ کو یک طرفہ مقابلے میں شکست دے کر ٹی 20 ورلڈ کپ 2026 کا خطاب اپنے نام کر لیا۔

میچ کے بعد انعامات کی تقریب میں سنجو سیمسن کو پورے ٹورنامنٹ میں شاندار کارکردگی کے لیے پلیئر آف دی ٹورنامنٹ کا اعزاز دیا گیا۔ سیمسن نے کہا کہ یہ لمحہ ان کے لیے خواب کے سچ ہونے جیسا ہے اور وہ اپنی خوشی کو الفاظ میں بیان نہیں کر سکتے۔ انہوں نے بتایا کہ 2024 کے ٹی-20 ورلڈ کپ میں ٹیم کے ساتھ ہونے کے باوجود ایک بھی میچ نہ کھیل پانے کے بعد وہ کافی مایوس ہوئے تھے لیکن انہوں نے ہمت نہیں ہاری اور مسلسل خود کو بہتر بنانے کی کوشش جاری رکھی۔

دوسری جانب فائنل میں شاندار گیند بازی کرنے والے جسپریت بمراہ کو پلیئر آف دی فائنل قرار دیا گیا۔ بمراہ نے 4 اوور میں صرف 15 رن دے کر 4 وکٹ حاصل کیے اور نیوزی لینڈ کی بیٹنگ لائن کو ابتدا ہی میں دباؤ میں ڈال دیا۔