ہندوستان 326 رن پر آؤٹ، آسٹریلیا پر 131رن کی بیش قیمتی سبقت

ملبورن: ہندوستان نے کپتان اجنکیا رہانے کی (112) سنچری اور آل راؤنڈر روندر جڈیجہ کی (57) نصف سنچری کی مدد سے آسٹریلیا کے خلاف دوسرے باکسنگ ڈے ٹسٹ کے تیسرے دن پیر کو پہلی اننگز میں 326 رنز بنائے۔ اور بیش قیمتی 131 رنزکی سبقت حاصل کرلی۔

ہندوستان نے تیسرے دن پانچ وکٹ پر 273 رنز پر کھیلنا شروع کیا اور ان کی اننگز 115.1 اوورز میں 326 رنز پر آؤٹ ہوگئی۔ دوسرے دن ایک سرے سے محاذ پر ڈٹے کپتان رہانے تیسرے دن کا کھیل شروع ہونے کے فوراً بعد رن آؤٹ ہونے کے بعد اپنی وکٹ کھو بیٹھے۔ رہانے نے 223 گیندوں میں 12 چوکوں کی مدد سے 112 رنز بنائے۔ رہانے نی اپنے کریئر کی 12 ویں اور کپتان کی حیثیت سے پہلی سنچری اسکور کی۔ رہانے اور جڈیجہ نے چھٹی وکٹ کے لئے بیش قیمتی121 رنز جوڑے۔

رہانے کے آؤٹ ہونے کے بعد جڈیجہ نے اپنے کریئر کی 15 ویں نصف سنچری مکمل کی، نصف سنچری اسکور کرنے کے بعد، وہ اپنی اننگز کو زیادہ لمبا نہیں بڑھا سکے اور مچل اسٹارک کی گیند پر پیٹ کمنز کو کیچ دے کر پویلین لوٹ گئے۔ جڈیجہ نے 159 گیندوں پر 57 رنز کی اننگز میں تین چوکے لگائے۔ جڈیجہ کا وکٹ 306 کے اسکور پر گرا اور ان کے آؤٹ ہونے کے بعد لوئر آرڈر کا کوئی بھی بلے باز زیادہ دیر تک کریز پر کھڑا نہ رہ سکا۔ ہندوستان کی آخری تین وکٹیں صرف 20 رنز پر گر گئیں۔ امیش یادو کو نیتھن لیون نے اسٹیون اسمتھ کے ہاتھوں کیچ کرایا۔ امیش نے 19 گیندوں پر ایک چوکے کی مدد سے نو رنز بنائے۔

امیش کے آؤٹ ہونے کے بعد اگلے ہی اوور میں روی چندرن اشون کی حیثیت سے ہندوستان کو نوواں دھچکا لگا۔ اشون نے جوش ہیزل ووڈ کی گیند پرلیون کے ہاتھوں کیچ تھما دی۔ انہوں نے 42 گیندوں میں 14 رنز بنائے۔ جسپریت بمراہ کھاتہ کھولے بغیر پہلی ہی گیند پر آؤٹ ہوئے۔ بمراہ کولیون نےآؤٹ کیا۔ محمد سراج بغیر کوئی رن بنائے ناٹ آؤٹ رہے۔

ہندوستان کی پہلی اننگز میں نوجوان اوپنر شبھمن گل نے 45، چیتشور پجارا نے 17، ہنوما وہاری نے 21 اور وکٹ کیپر رشبھ پنت نے 29 رنز بنائے۔ آسٹریلیا کے لئے لیون نے 27.1 اوورز میں 72 رن پر تین، فاسٹ بالر مچل اسٹارک نے 26 اوورز میں 78 رن پر تین، کمنز نے 27 اوورز میں 80 رن پر دو اور ہیزل ووڈ نے 23 اوورز میں 47 رن پر ایک وکٹ حاصل کرنے میں کامیاب رہے۔