ایشیا کپ اور عالمی کپ سے قبل پاکستان کرکٹ بورڈ کا بڑا فیصلہ، انضمام الحق کو بنایا گیا چیف سلیکٹر

رواں سال ہونے والے ایشیا کپ اور عالمی کپ سے قبل پاکستان کرکٹ بورڈ (پی سی بی) نے پاکستان کے مشہور سابق بلے باز انضمام الحق کو بڑی ذمہ داری سونپنے کا اعلان کیا ہے۔ انضمام الحق کو پاکستان کرکٹ ٹیم کا چیف سلیکٹر بنایا گیا ہے۔

قابل ذکر ہے کہ رواں ماہ کے آخر میں ایشیا کپ ٹورنامنٹ ہونا ہے اور اس کے بعد ہندوستان میں عالمی کپ کا انعقاد ہوگا۔ ان دونوں اہم ٹورنامنٹس کو دیکھتے ہوئے پی سی بی نے بڑا قدم اٹھاتے ہوئے انضمام الحق کو چیف سلیکٹر بنایا ہے اور اس فیصلے کو ’ماسٹر اسٹروک‘ تصور کیا جا رہا ہے۔ امید کی جا رہی ہے کہ انضمام الحق کے تجربہ کا فائدہ پاکستانی ٹیم کو مل سکتا ہے اور انضمام ٹیم میں توازن قائم کرنے میں اہم کردار بھی نبھا سکتے ہیں۔

غور کرنے والی بات یہ ہے کہ انضمام الحق کے پاکستانی کپتان بابر اعظم سے اچھے روابط ہیں۔ پاکستان میں کوچ، کپتان اور چیف سلیکٹرس کے درمیان اچھے رشتے بہت کم ہی دیکھنے کو ملتے ہیں۔ اس نظریہ سے دیکھا جائے تو پاکستانی ٹیم کے لیے انضمام الحق کا چیف سلیکٹر بننا نیک شگون ثابت ہو سکتا ہے۔

واضح رہے کہ انضمام الحق پہلے بھی پاکستانی ٹیم کے چیف سلیکٹر رہ چکے ہیں۔ انضمام نے 2016 سے 2019 تک یہ ذمہ داری سنبھالی تھی۔ اس دوران پاکستانی ٹیم نے آئی سی سی چمپئنز ٹرافی 2017 جیتی تھی۔ فائنل میں پاکستان نے ہندوستان کو شکست دی تھی۔ اب ایک بار پھر ایک بڑے آئی سی سی ٹورنامنٹ سے پہلے پی سی بی کو انضمام کی یاد آئی ہے۔