تیل کے دام پھر بڑھائے گئے، مئی سے اب تک پٹرول-ڈیزل کے داموں میں 8 روپے سے زیادہ کا اضافہ

نئی دہلی: پٹرولیم مصنوعات کے داموں میں بنگال الیکشن کے بعد جو آگ بڑھکی تھی اس کے شعلے ابھی عوام کو مسلسل جھلسا رہے ہیں اور پٹرول اور ڈیزل کے داموں میں ہر دوسرے تیسرے دن اضافہ کیا جا رہا ہے۔ اتوار کے روز قیمتوں میں لگاتار دوسرے دن اضافہ کیا گیا ہے۔

ملک کے چار بڑے شہروں میں پٹرول کی قیمت میں 35 پیسے اور ڈیزل کی قیمت میں 26 پیسے تک کا اضافہ کیا گیا۔ اضافہ کے بعد دہلی میں پٹرول 98.46 روپے اور ڈیزل 88.90 روپے فی لیٹر کی بلند ترین سطح پر پہنچ گیا۔

دہلی میں جون میں اب تک پٹرول کی قیمت میں 4.23 روپے اور ڈیزل کی قیمت میں 3.75 روپے کا اضافہ ہوا ہے۔ اس سے قبل مئی میں پٹرول 3.83 روپے اور ڈیزل 4.42 روپے مہنگا ہوا تھا۔ ادھر، ممبئی میں پٹرول کی قیمت 34 پیسے کے اضافے سے 104.56 روپے فی لیٹر ہوگئی۔ جبکہ ڈیزل 26 پیسے مہنگا ہو کر ریکارڈ 96.42 روپے فی لیٹر تک پہنچ گیا۔

چنئی میں پٹرول 30 پیسے مہنگا ہو کر 99.49 روپے اور ڈیزل 23 پیسے اضافے سے 93.46 روپے فی لیٹر مہنگا ہو گیا۔ کولکاتا میں پٹرول 33 پیسے اور ڈیزل 25 پیسے مہنگا ہوا۔ یہاں ایک لیٹر پٹرول 98.30 روپے اور ایک لیٹر ڈیزل کی قیمت 91.75 روپے ہو گئی۔

آج ملک کے چار بڑے شہروں میں پٹرول اور ڈیزل کی قیمتیں کچھ اس طرح ہیں:

شہر کا نام —— پٹرول روپے / لیٹر —— ڈیزل روپے / لیٹر

دہلی ————— 98.46 —————— 88.90

ممبئی ————— 104.56 ————— 96.42

چنئی ————— 99.49 -————— 93.46

کولکاتا ———— 98.33 —————— 91.75