اجے ماکن نے پکڑا کیجریوال کا جھوٹ! ’گزشتہ 5 سالوں کے دوران جی ڈی پی میں سب سے زیادہ نہیں بلکہ سب سے کم اضافہ‘

نئی دہلی: کانگریس کے سینئر لیڈر اجے ماکن نے دہلی کے وزیر اعلی اروند کیجریوال کے اس دعوے کو جھوٹا قرار دیا ہے جس میں انہوں نے کہا ہے کہ گزشتہ 5 برسوں کے دوران دہلی کی جی ایس ڈی پی (گراس اسٹیٹ ڈومیسٹک پروڈکٹ) میں 50 فیصد کا اضافہ ہوا ہے اور اتنا اضافہ ہندوستان کی کسی ریاست میں کبھی درج نہیں کیا گیا! اجے ماکن نے کہا کہ اس سے بڑا جھوٹ نہیں ہو سکتا کیونکہ حقیقت یہ ہے کہ دہلی میں عام آدمی پارٹی کی مدت کار کے دوران جی ایس ڈی پی میں سب سے کم اضافہ درج کیا گیا ہے۔

خیال رہے کہ اروند کیجریوال نے دہلی اسمبلی میں کہا تھا کہ پورے ملک نے ایل جی صاحب کی تقریر سنی ہے۔ ایک طرح سے انہیں مرکزی حکومت کا نمائندہ سمجھا جاتا ہے، انہوں نے ہماری حکومت کی تعریف کی۔ پانچ سالوں میں جی ایس ڈی پی میں 50 فیصد کا اضافہ درج کیا گیا ہے۔ ہندوستان میں کبھی کسی ریاست کی جی ڈی پی میں اتنا اضافہ نہیں ہوا تھا۔ دہلی حکومت نے ایسا شاندار کام کیا ہے کہ مرکزی حکومت کے مقرر کردہ ایل جی نے بھی اس کی تعریف کی ہے۔

اے آئی سی سی کے جنرل سکریٹری اجے ماکن نے ایک ویڈیو جاری کرتے ہوئے کہا کہ دہلی میں کانگریس کے دور حکومت میں پانچ نہیں بلکہ تین سال میں جی ڈی پی میں 50 فیصد اضافہ درج کیا جاتا تھا اور یہ شیلا دیکشت کی محنت کا نتیجہ تھا۔ اجے ماکن نے ویڈیو کے میں ایک پریزینٹیشن کے ذریعے بتایا کہ دہلی میں سال 2007-08 سے لے کر سال 2014-15 تک جی ایس ڈی پی میں لگاتار اضافہ درج کیا گیا۔ انہوں نے کہا کہ اس دورانیہ میں کانگریس نے ہر مرتبہ محض تین سال میں ہی جی ایس ڈی پی کی شرح نمو میں 50 فیصد اضافہ کا ہدف حاصل کر لیا تھا۔

انہوں نے بتایا کہ عام آدمی پارٹی کی حکومت برسراقتدار آنے پر 2015-16 سے 2021-22 تک جی ایس ڈی پی کے 50 فیصد اضافہ تک پہنچنے میں 4 سال لگنے لگے اور 2018-19 اور سال 2021-22 میں تو 50 فیصد اضافہ تک پہنچنے میں 5 سال لگ گئے۔ نیز 2021-21 میں جی اس ڈی پی میں اضافہ نہیں بلکہ کمی درج کی گئی۔

اجے ماکن نے الزام عائد کیا کہ کیجریوال کے بارے میں ان کے پرانے ساتھی صحیح کہتے ہیں کہ وہ جتنا زور زور سے بولتے ہیں وہ اتنا ہی بڑا جھوٹ بولتے ہیں۔ تمام اخبارات میں سرخیاں تو آپ نے مینیج کر لیں لیکن یہ کون بتائے گا کہ اپ کے آنے کے بعد جی ڈی پی کی ترقی کی رفتار سست ہو گئی ہے۔

غورطلب ہے کہ دہلی کے لیفٹیننٹ گورنر انل بیجل نے بدھ کے روز اپنے بیان میں کہا تھا کہ 2016-17 کے بعد دہلی کی جی ڈی پی پانچ سالوں میں 50 فیصد کا اضافہ درج کیا گیا۔ 2021-22 میں دہلی کی جی ڈی پی 923967 کروڑ روپے تھی اور اس میں 2016-17 کے 616085 کروڑ روپے کے مقابلے 50 فیصد کا اضافہ درج کیا گیا۔