'پریشانیوں کو شیئر کریں، خود پر یقین رکھیں' – ’پریکشا پے چرچا‘ میں دیپیکا پادوکون کی طلبہ کو نصیحت

نئی دہلی: امتحانات کے دوران طلبہ کو درپیش ذہنی دباؤ اور اس سے نمٹنے کے طریقوں پر روشنی ڈالنے کے لیے وزیراعظم نریندر مودی کے پروگرام 'پریکشا (امتحان) پے چرچا' کے آٹھویں ایڈیشن میں معروف اداکارہ دیپیکا پادوکون نے شرکت کی۔ انہوں نے طلبہ سے اپنے ذاتی تجربات شیئر کیے اور ان کی حوصلہ افزائی کی کہ وہ اپنے احساسات کو دبانے کے بجائے والدین اور اساتذہ سے گفتگو کریں۔

دیپیکا پادوکون نے بچپن میں اپنی سرگرمیوں کے بارے میں بتاتے ہوئے کہا کہ وہ کافی متحرک اور شرارتی تھیں۔ ان کے بقول، ’’میرے والدین آج بھی کہتے ہیں کہ میں ہمیشہ صوفے، میز اور کرسیوں پر کودتی رہتی تھی۔ مجھے غیر نصابی سرگرمیوں میں بہت دلچسپی تھی۔‘‘

انہوں نے وزیراعظم نریندر مودی کا شکریہ ادا کرتے ہوئے کہا کہ ’پریکشا پے چرچا' جیسے پروگرام کے ذریعے طلبہ کے ذہنی دباؤ کو کم کرنے پر توجہ دی جا رہی ہے، جو ایک خوش آئند قدم ہے۔

پروگرام کے دوران دیپیکا نے طلبہ کو مشورہ دیا کہ وہ ان چیزوں پر توجہ دیں جن پر ان کا اختیار ہے اور غیر ضروری دباؤ کو خود پر حاوی نہ ہونے دیں۔ انہوں نے کہا، ’’اپنے والدین اور اساتذہ سے کھل کر اپنی پریشانیوں کے بارے میں بات کریں، اس کی وجوہات کو سمجھیں اور کسی ایسے شخص سے شیئر کریں جس پر آپ اعتماد کرتے ہیں۔‘‘

انہوں نے طلبہ کو تناؤ سے نمٹنے کے لیے مراقبہ (میڈی ٹیشن) اور ورزش کو اپنی روزمرہ کی عادت بنانے کی تجویز دی۔ دیپیکا پادوکون نے اس بات پر بھی زور دیا کہ غلطیاں کرنا سیکھنے کا ایک لازمی حصہ ہے اور طلبہ کو اپنی ناکامیوں سے گھبرانے کے بجائے ان سے سیکھنا چاہیے۔ انہوں نے نیچر میں وقت گزارنے اور مناسب آرام کرنے کو بھی ضروری قرار دیا۔

پروگرام کے دوران دیپیکا نے طلبہ کے ساتھ ایک انٹرایکٹو سرگرمی بھی کروائی، جس میں طلبہ نے کاغذ کے ٹکڑوں پر اپنی صلاحیتیں لکھ کر ایک بورڈ پر چسپاں کیں۔ انہوں نے اس سرگرمی کے ذریعے یہ پیغام دیا کہ، ’’اگر آپ اپنی کمزوریوں کے بجائے اپنی خوبیوں پر توجہ دیں، تو آپ کو احساس ہوگا کہ آپ کئی چیزوں میں بہترین ہیں۔‘‘ پروگرام کو مزید دلچسپ بنانے کے لیے دیپیکا نے طلبہ کے ساتھ کچھ گیمز بھی کھیلے۔

اس سے قبل، دیپیکا پادوکون نے انسٹاگرام پر ایک ویڈیو پوسٹ کرتے ہوئے ’پریکشا پے چرچا‘ میں اپنی شرکت کا اعلان کیا تھا۔ انہوں نے تعلیمی نظام میں ذہنی صحت کی اہمیت کو اجاگر کرتے ہوئے وزیراعظم نریندر مودی کی جانب سے طلبہ کے دباؤ کو کم کرنے کی کوششوں کو سراہا تھا۔