رجنی کانت: اسٹائل، ڈائیلاگ اور کرشماتی اسکرین پرفارمنس کے لازوال سپر اسٹار

جنوبی ہندوستان کے سپر اسٹار رجنی کانت، جن کا یومِ پیدائش آج 12 دسمبر کو منایا جاتا ہے، ہندستانی سنیما کی تاریخ کی ان شخصیات میں سے ہیں جنہوں نے نہ صرف فلمی دنیا کو متاثر کیا بلکہ ایک ثقافتی علامت کی حیثیت بھی حاصل کی۔ ان کا اسٹائل، ڈائیلاگ ڈیلیوری، باڈی لینگویج اور منفرد اسکرین پریزنس انہیں دنیا بھر میں مقبول بناتی ہے۔ رجنی کانت کی ایک عام انسان سے غیر معمولی شہرت تک کے سفر کی کہانی محنت، لگن اور خود اعتمادی سے بھرپور ہے۔

رجنی کانت کا اصل نام شیواجی راؤ گائیکواڑ ہے۔ ان کی پیدائش 12 دسمبر 1950 کو بنگلورو میں ایک معمولی گھرانے میں ہوئی۔ والد پولیس میں کانسٹیبل تھے اور معاشی تنگی کے باعث بچپن ہی سے کام کرنا پڑا۔ انہوں نے کارپنٹر، کلرک اور بعد میں بس کنڈکٹر کی نوکری کی، جہاں ان کا اسٹائل اور آواز عام لوگوں میں پہچان بنانے لگے۔ یہی زندگی کا وہ مرحلہ تھا جس نے انہیں جدوجہد کی اہمیت سکھائی۔ اداکاری کا شوق شروع سے تھا اور تھیٹر میں ان کی شرکت نے ان کے خواب کو سمت دی۔

دوستوں کے مشورے پر انہوں نے مدراس فلم انسٹی ٹیوٹ میں پرویش لیا، جہاں سے ان کی زندگی کا رخ بدل گیا۔ اسی دوران تمل فلموں کے معروف ہدایت کار کے بال چندر نے ایک ڈرامے میں ان کی کارکردگی دیکھی اور انہیں اپنی فلم اپوروا رنگاگل (1975) میں موقع دیا۔ یہ رجنی کانت کے فلمی سفر کی حقیقی شروعات تھی۔ ابتدا میں وہ ولن یا معاون کردار نبھاتے رہے لیکن ان کے انداز، اعتماد اور تنوع نے جلد انہیں انڈسٹری کا ناقابلِ نظرانداز چہرہ بنا دیا۔

سال 1978 میں ریلیز ہونے والی بھیروی پہلی فلم تھی جس میں انہیں مرکزی کردار ملا اور یہ باکس آفس پر سپر ہٹ ثابت ہوئی۔ اس کے بعد ان کی شہرت میں تیزی سے اضافہ ہوا۔ 1980 کی فلم بلا، جو امیتابھ بچن کی ڈان کا ریمیک تھی، نے انہیں مزید بلندیوں تک پہنچایا۔ 1983 میں اندھا قانون کے ذریعے انہوں نے بالی ووڈ میں قدم رکھا اور یہاں بھی اپنی انوکھی اداکاری سے ناظرین کو متاثر کیا۔ اسی دور میں جان جانی جناردن میں ان کا ٹرپل رول بھی خاصا قابلِ ذکر رہا۔

نوے کی دہائی رجنی کانت کے نام رہی۔ انہوں نے مسلسل ایسی فلمیں دیں جو عوام میں مقبول ہوئیں اور باکس آفس پر بہترین کارکردگی دکھاتی رہیں۔ 2007 میں شیواجی دی باس نے کامیابی کے نئے ریکارڈ قائم کیے اور یہ وہ پہلی ہندستانی فلم تھی جس میں ہالی ووڈ کی اعلیٰ ریزولیوشن تکنیک استعمال کی گئی۔ 2010 میں ریلیز ہونے والی روبوٹ (اصل نام انتھرن) نے 255 کروڑ روپے سے زیادہ کی کمائی کی اور رجنی کانت کو بین الاقوامی سطح پر نئی شناخت دی۔ اس فلم میں ایشوریہ رائے ان کے ساتھ تھیں۔

سال 2014 میں کوچادائیاں اور لنگا ریلیز ہوئیں۔ اگرچہ ان فلموں نے باکس آفس پر کوئی خاص کمال نہیں دکھایا مگر رجنی کانت کی مقبولیت میں کوئی کمی نہ آئی۔ مجموعی طور پر انہوں نے 160 سے زائد فلموں میں کام کیا جس میں تمل اور ہندی دونوں زبانوں کی فلمیں شامل ہیں۔ ان کے مداح صرف ہندستان تک محدود نہیں بلکہ جاپان، مشرقِ وسطیٰ، جنوب مشرقی ایشیا اور امریکا تک پھیلے ہوئے ہیں۔

سپر اسٹار ہونے کے باوجود ان کی سادگی، عاجزی اور شخصیت کی بےپروائی نے عوام کے دلوں میں ان کی عزت بڑھائی۔ ذاتی زندگی میں انہوں نے 1981 میں لتا رنگاچاری سے شادی کی اور ان کی دو بیٹیاں، ایشوریا اور سوندریا، فلمی دنیا سے وابستہ ہیں۔ رجنی کانت نے وقتاً فوقتاً سیاست میں آنے کا اظہار بھی کیا۔ 2020 میں انہوں نے سیاسی جماعت بنانے کا اعلان کیا، مگر صحت کے مسائل کے باعث اسے واپس لینا پڑا۔ اس کے باوجود عوام میں ان کی اخلاقی مقبولیت برقرار رہی۔

بطور اداکار انہیں کئی اعزازات ملے جن میں پدما بھوشن، پدما وبھوشن، نیشنل فلم ایوارڈ اور کئی فلمی ایوارڈ شامل ہیں۔ نلونُکو نلون کے لیے انہیں 1984 میں بہترین تمل اداکار کا فلم فیئر ایوارڈ ملا، جبکہ شیواجی اور انتھرن کے لیے نامزدگیاں۔ رجنی کانت کے یادگار ڈائیلاگز آج بھی مداحوں کے ذہنوں میں نقش ہیں۔ ان کی فلمی شخصیت طاقت، اسٹائل اور کرشمے کا امتزاج ہے جبکہ ذاتی زندگی میں وہ ایک انتہائی سادہ مزاج انسان ہیں—شاید یہی تضاد انہیں اتنا محبوب بناتا ہے۔