ممتاز نے مداحوں کی خواہش پوری کی، جلد ساڑی میں نظر آنے کا وعدہ

ممبئی: مایہ ناز اداکارہ ممتاز نے اپنے مداحوں کی درخواست پر روایتی ہندوستانی لباس پہن کر ان کی خواہش پوری کی۔ انہوں نے انسٹاگرام پر ایک ویڈیو شیئر کی جس میں وہ سفید چُوڑی دار شلوار قمیض میں انتہائی دلکش نظر آ رہی ہیں۔ اس ویڈیو میں ممتاز نے وعدہ کیا کہ جلد ہی وہ ساڑی میں بھی نظر آئیں گی۔

ویڈیو کے کیپشن میں ممتاز نے لکھا، ’’ہیلو! میرے دوستوں، آپ نے کہا تھا کہ میں ہندوستانی لباس پہنوں، اس لیے میں نے آپ کے لیے چُوڑی دار شلوار قمیض پہنی ہے۔ اگلی بار میں ساڑی پہنوں گی۔ براہ کرم بتائیں کہ میں ساڑی میں اچھی لگتی ہوں یا چُوڑی دار قمیض میں۔ بہت سارا پیار۔‘‘

ویڈیو میں ممتاز کہتی ہیں، "نمستے، آپ لوگوں نے کہا تھا کہ مجھے ہندوستانی کپڑوں میں دیکھنا چاہتے ہیں، تو میں نے خاص آپ کے لیے یہ لباس پہنا ہے۔ مجھے امید ہے کہ آپ کو پسند آئے گا۔ آپ کے لئے پیار۔‘‘

اس ویڈیو پر مداحوں نے دل کھول کر محبت کا اظہار کیا ہے۔ اداکارہ اور سماجی کارکن سومی علی نے بھی ردعمل دیا۔ انہوں نے ممتاز کی تعریف کرتے ہوئے ایک یادگار لمحے کا ذکر کیا جب وہ 7 سال کی تھیں اور راجیش کھنہ سے ملاقات ہوئی تھی۔ انہوں نے کہا کہ بچپن میں انہوں نے راجیش کھنہ سے شادی کی خواہش ظاہر کی تھی جس پر انہیں چاکلیٹ اور گال پر بوسہ ملا تھا۔

سفید لباس میں شاندار نظر آنے والی 77 سالہ ممتاز نے کئی یادگار فلموں میں کام کیا جن میں ’رام اور شیام‘، ’میرے ہم دم میرے دوست‘، ’سچا جھوٹا‘، ’کھلونا‘، ’ہرے راما ہرے کرشنا‘ اور ’روٹی‘ شامل ہیں۔ ان کا فلمی سفر 1958 میں بطور چائلڈ اسٹار ’سونے کی چڑیا‘ سے شروع ہوا تھا۔