سیف علی خان کو اسپتال پہنچانے والے ڈرائیور کو میکا سنگھ نے بھی انعام دینے کا کیا اعلان، ملیں گے ایک لاکھ روپے

بالی ووڈ اداکار سیف علی خان اسپتال سے گھر پہنچنے کے بعد اب ڈاکٹروں کے مشورے پر آرام کر رہے ہیں۔ فی الحال انھیں ورزش کرنے اور شوٹنگ پر جانے سے منع کیا گیا ہے۔ اس درمیان سیف علی خان کو زخمی حالت میں لیلاوتی اسپتال پہنچانے والے آٹو ڈرائیور بھجن سنگھ رانا کی قسمت بہت مہربان نظر آ رہی ہے۔ انھیں پہلے ہی اپنے اچھے اخلاق کے لیے 2 بار نقدی انعام مل چکے ہیں، اب مشہور گلوکار میکا سنگھ نے بھی انھیں انعام دینے کا اعلان کیا ہے۔

میکا سنگھ نے 22 جنوری کو اپنے انسٹاگرام ہینڈل پر ایک پوسٹ کیا ہے۔ اس میں انھوں نے کہا ہے کہ آٹو ڈرائیور 11 ہزار روپے کی جگہ 11 لاکھ روپے انعام کا حقدار ہے۔ دراصل بالی ووڈ سے جڑے ایک یوٹیوبر نے گزشتہ دنوں آٹو ڈرائیور بھجن سنگھ کو 11 ہزار روپے کا انعام دیا تھا۔ اسی انعامی رقم کو لے کر سوشل میڈیا پر کچھ لوگ بحث کر رہے ہیں کہ کیا یہ رقم کافی ہے!

اسی تعلق سے میکا سنگھ نے اپنے پوسٹ میں لکھا ہے کہ ’’مجھے لگتا ہے اس آٹو ڈرائیور کو 11 ہزار نہیں بلکہ 11 لاکھ روپے کا انعام دینا چاہیے۔ انھوں نے ہیرو کی طرح بالی ووڈ سپراسٹار سیف علی خان کی جان بچانے میں اپنا اہم کردار نبھایا ہے۔‘‘ ساتھ ہی وہ لکھتے ہیں کہ ’’میری سبھی لوگوں سے گزارش ہے کہ برائے کرم ان سے (آٹو ڈرائیور سے) رابطہ کرنے کی تفصیل مجھے دیں، تاکہ میں انھیں انعام کے طور پر ایک لاکھ روپے دے سکوں۔‘‘ یعنی انھوں نے 11 لاکھ روپے تو نہیں، لیکن ایک لاکھ روپے دینے کا اعلان ضرور کر دیا۔ میکا سنگھ کے اس قدم کی سوشل میڈیا پر خوب تعریف ہو رہی ہے۔

قابل ذکر ہے کہ سیف علی خان نے اپنی جان بچانے والے آٹو ڈرائیور سے اسپتال میں ملاقات کی تھی۔ اس کی کچھ تصویریں سامنے آئی تھیں۔ بعد میں یہ خبر بھی سامنے آئی تھی کہ سیف علی خان کی طرف سے بھجن سنگھ کو 50 ہزار روپے دیے گئے ہیں۔ حالانکہ اس سلسلے میں بھجن سنگھ نے کچھ بھی کہنے سے پرہیز کیا ہے۔ لیکن جس طرح سے انھیں لگاتار انعامی رقم مل رہے ہیں، اس سے تو یہی کہا جا سکتا ہے کہ بھجن سنگھ رانا کی قسمت ان پر بہت مہربان نظر آ رہی ہے۔