اسرائیل کا "صومالی لینڈ" کو تسلیم کرنا اشتعال انگیز اقدام ہے: صومالیہ

صومالیہ کے وزیر خارجہ عبدالسلام عبدی علی نے کہا ہے کہ اسرائیل کی جانب سے صومالی لینڈ کے خطے کو تسلیم کرنا ایک جارحانہ اور اشتعال انگیز قدم ہے اور یہ علاقائی سلامتی کے لیے براہِ راست خطرہ ہے۔ انہوں نے اشارہ کیا کہ ملک کی خودمختاری اور علاقائی سالمیت ایسی "سرخ لکیریں" ہیں جن پر کوئی سمجھوتہ نہیں کیا جا سکتا۔

وزیر نے مزید کہا کہ صومالی حکومت نے اسرائیل سے باضابطہ مطالبہ کیا ہے کہ وہ اس تسلیم سازی سے پیچھے ہٹ جائے، اور انہوں نے خطے کے استحکام پر اس کے اثرات کے بارے میں خبردار کیا۔ انہوں نے اس بات پر بھی زور دیا کہ صومالی لینڈ کے خطے کے ساتھ بات چیت جاری رہے گی جس کا مقصد ایک ایسا پرامن حل نکالنا ہے جو صومالیہ کی وحدت اور اس کی خودمختاری کی حفاظت کرے۔

وزیر خارجہ نے اختلافات کو دور کرنے کے لیے اپنے ملک کی جانب سے سفارتی راستے پر گامزن ہونے کی بھی تصدیق کی۔ انہوں نے متعلقہ فریقوں سے مطالبہ کیا کہ وہ بین الاقوامی قانون اور ریاستوں کی خودمختاری اور علاقائی سالمیت کے اصولوں کا احترام کریں۔

صومالی صدر حسن شیخ محمود نے اسرائیلی وزیراعظم بنجامن نیتن یاہو پر شدید تنقید کی ہے۔ صومالی لینڈ کو اسرائیلی تسلیم سازی کے حوالے سے صومالی پارلیمنٹ کے غیر معمولی اجلاس میں خطاب کرتے ہوئے صدر محمود نے کہا کہ نیتن یاہو نے تاریخی طور پر صومالی خودمختاری کی سب سے بڑی خلاف ورزی کی ہے۔

یہ بیانات ایک ایسے وقت میں سامنے آئے ہیں جب ہفتہ کو 21 ملکوں اور اسلامی تعاون تنظیم (او آئی سی ) نے ایک مشترکہ بیان جاری کیا تھا جس میں اسرائیل کی جانب سے صومالی لینڈ کو تسلیم کرنے کے فیصلے کو مسترد کر دیا گیا تھا۔ ان ملکوں نے صومالیہ کی خودمختاری کی مکمل حمایت کا اظہار کیا اور کسی بھی ایسے اقدام کو مسترد کیا جو ملک کی وحدت اور علاقائی سالمیت میں خلل ڈالے۔

یاد رہے ’’ صومالی لینڈ ‘‘ نے 1991 میں خانہ جنگی کے آغاز کے بعد موغادیشو سے یکطرفہ علیحدگی کا اعلان کیا تھا۔ تاہم تب سے اب تک اسے اقوام متحدہ کے کسی بھی رکن ملک کی جانب سے باضابطہ بین الاقوامی تسلیم حاصل نہیں ہو سکی۔ اسے بین الاقوامی سطح پر وفاقی صومالیہ کے اندر ایک خود مختار علاقے کے طور پر ہی سمجھا جا رہا ہے۔ (بشکریہ نیوز پورٹل ’العربیہ ڈاٹ ںیٹ، اردو‘)