شام: دمشق کے چرچ میں ایک خوفناک خودکش حملہ، 20 افراد ہلاک، متعدد زخمی

شام کے دارالحکومت دمشق کے ایک چرچ میں اتوار کو اس وقت خوفناک خودکش دھماکہ ہوا جب وہاں دعائیہ اجتماع جاری تھا۔ حملے میں 20 افراد ہلاک اور 13 شدید زخمی ہوئے۔ سرکاری میڈیا نے اسے بزدلانہ دہشت گردانہ حملہ قرار دیا ہے، حالانکہ ابھی تک کسی تنظیم نے اس حملے کی ذمہ داری قبول نہیں کی ہے۔

خبر رساں ادارے رائٹرز کے مطابق شام کے دارالحکومت دمشق کے علاقے دوئیلا میں واقع مار الیاس چرچ میں خودکش بم دھماکہ ہوا۔ جس میں 20 افراد ہلاک ہو ئے۔ شامی سکیورٹی ذرائع کے مطابق حملہ آور نے چرچ کے اندر خود کو دھماکے سے اڑا لیا۔

شام کی وزارت داخلہ نے تصدیق کی ہے کہ دمشق کے علاقے دوئیلا میں سینٹ مار الیاس چرچ میں خوفناک خودکش حملہ دہشت گرد تنظیم داعش سے وابستہ ایک خودکش بمبار نے کیا۔ وزارت کے مطابق حملہ آور پہلے چرچ میں داخل ہوا، ہجوم پر اندھا دھند فائرنگ کی اور پھر خود کو دھماکہ خیز جیکٹ سے اڑا لیا۔

شام کے وزیر اطلاعات ڈاکٹر حمزہ المصطفیٰ نے اس دہشت گردانہ حملے کی شدید مذمت کرتے ہوئے کہا ہے کہ ہم دوئیلا کے چرچ پر ہونے والے اس دہشت گردانہ حملے کی شدید مذمت کرتے ہیں اور جاں بحق ہونے والوں کے اہل خانہ سے دلی تعزیت کا اظہار کرتے ہیں۔ یہ بزدلانہ حرکت ہماری شہری اتحاد اور بھائی چارے کی اقدار کے خلاف ہے۔ انہوں نے کہا کہ شامی معاشرہ قومی اتحاد اور شہری امن پر یقین رکھتا ہے اور تمام برادریوں کے درمیان بھائی چارے کو مضبوط کرنے کی ضرورت ہے۔ انہوں نے اس بات کا بھی اعادہ کیا کہ حکومت وطن عزیز کے تحفظ کو یقینی بنانے کے لیے دہشت گرد تنظیموں کے خلاف سخت کارروائی جاری رکھے گی۔ (بشکریہ نیوز پورٹل ’آج تک‘)