ویڈیو: میری بات میں مذہبی اداروں میں شفافیت اور جواب دہی کا نظام مضبوط کرنے پر زور

قومی آواز کے پروگرام ’میری بات‘ کی پانچویں قسط میں ڈیجیٹل ایڈیٹر سید خرم رضا نے مذہبی اداروں میں نذرانوں اور عطیات کے شفاف انتظام، جواب دہی اور عوامی اعتماد کے تحفظ سے متعلق اہم نکات پیش کیے۔ انہوں نے کہا کہ مذہبی مقامات پر پیش آنے والے مالی بے ضابطگی کے الزامات کی غیر جانبدارانہ، شفاف اور بروقت تحقیقات ہونی چاہئیں تاکہ حقیقت عوام کے سامنے آ سکے اور انصاف ہوتا ہوا بھی نظر آئے۔

انہوں نے کہا کہ مذہبی اداروں میں مالی معاملات کے لیے واضح اور جدید نظام قائم کرنے کی ضرورت ہے۔ ان کے مطابق نذرانوں اور عطیات کے حساب کتاب، سالانہ جانچ، آزادانہ نگرانی اور مالی تفصیلات کو عوام کے سامنے پیش کرنا معمول کا حصہ ہونا چاہیے۔ انہوں نے تجویز دی کہ جدید ٹیکنالوجی کے ذریعے عطیات دینے والوں کو اپنے عطیے کی معلومات تک رسائی فراہم کی جا سکتی ہے، جس سے شفافیت اور اعتماد میں اضافہ ہوگا۔

سید خرم رضا نے کہا کہ کسی بھی مذہبی ادارے کی اصل طاقت اس کی عمارت نہیں بلکہ دیانت داری، شفافیت اور عوام کا اعتماد ہوتا ہے۔ انہوں نے زور دیا کہ ایسے نظام تشکیل دیے جائیں جن میں بدعنوانی اور شکوک و شبہات کی گنجائش کم سے کم ہو، تاکہ مذہبی ادارے عوام کے اعتماد اور امانت داری کی حقیقی علامت بنے رہیں۔