قومی آواز بلیٹن: اٹلی میں ہلاکتوں کی تعداد 17 ہزار سے زیادہ، سمیت دن بھر کی اہم خبریں

اٹلی میں ہلاکتوں کا سلسلہ تھمنے کا نام نہیں لے رہا اور اب وہاں ہلاک ہونے والوں کی تعداد 17 ہزار سے اوپر پہنچ گئی ہے اور متاثرین کی تعداد ایک لاکھ 35 ہزار سے زیادہ ہوگئی ہے

user

قومی آوازبیورو

پیش خدمت ہیں آج کی کچھ اہم خبریں

شبِ برأت پر گھروں میں ہی عبادت کریں: مفتی مکرم احمد

کورونا وائرس کے بڑھتے اثرات کے درمیان سب سے زیادہ مسئلہ مذہبی عبادات کو لے کر ہو رہا ہے۔ ہندو، مسلم، سکھ، عیسائی و دیگر مذاہب کے لوگ گھروں پر ہی دعاء و عبادت کرنے پر مجبور ہیں، کیونکہ لاک ڈاؤن کی وجہ سے سبھی مندر، مسجد، گورودوارے و چرچ وغیرہ میں عبادت کرنے پر پابندی عائد ہے۔ اس درمیان شب برأت کو لے کر بھی مسلم علماء و دانشوران نے اپیل کی ہے کہ وہ لاک ڈاؤن کے پیش نظر باہر نہ نکلیں اور گھروں میں ہی شب بیداری و عبادت کریں۔


ٹرمپ کا ڈبلو ایچ او پر الزام، فنڈنگ بند کرنے کی دھمکی

کورونا وائرس نے امریکہ میں کہرام مچا رکھا ہے۔ ہر دن ریکارڈ اموات ہو رہی ہیں۔ اس درمیان امریکی صدر ڈونالڈ ٹرمپ نے اس مہلک بیماری سے نمٹنے کو لے کر عالمی صحت ادارہ (ڈبلیو ایچ او) کو تنقید کا نشانہ بنایا ہے۔ انھوں نے کہا کہ ڈبلیو ایچ او چین پر زیادہ توجہ دے رہا ہے۔ امریکی صدر کا کہنا ہے کہ "ڈبلیو ایچ او کو امریکہ نے بڑے پیمانے پر معاشی مدد دی ہے۔ جب میں نے چین کے لیے سفر پر پابندی لگائی تو ڈبلیو ایچ او مجھ سے متفق نہیں تھا اور انھوں نے میری تنقید کی۔ وہ کئی چیزوں کے بارے میں غلط تھے۔ ایسا لگ رہا ہے کہ ان کی توجہ چین پر زیادہ ہے۔ ہم ڈبلیو ایچ او پر خرچ کی جانے والی فنڈنگ پر روک لگانے جا رہے ہیں۔"

کورونا متاثرین کی تعداد ساڑے 14 لاکھ کے پار

یوروپ کے کئی بڑے ممالک سمیت امریکہ میں کورونا کا قہر جاری ہے اور اب اس سے متاثر ہونے والوں کی تعداد ساڑے 14 لاکھ سے زیادہ ہوگئی ہے جبکہ مرنے والوں کی تعداد 83 ہزار سے تجاوز کرگئی ہے۔ ادھر سپر پاور کہے جانے والے ملک امریکہ میں اس وائرس کی وجہ سے حالات بہت خراب ہیں اور وہاں کل سب سے زیادہ ہلاکتیں ہوئی ہیں۔ امریکہ میں آخری اعداد و شمار ملنے تک متاثرین کی تعداد چارلاکھ سے اوپر پہنچ گئی ہے اور وہاں اس وبائی مرض سے ہونے والی اموات کی تعداد 12857 ہوگئی ہے۔


لاک ڈاؤن ہٹانے سے پہلے ریاستوں سے مشورہ کریں: چدمبرم

لاک ڈاؤن کی حمایت کرنے والے سب سے پہلے سیاسی رہنماؤں میں سے ایک سابق مرکزی وزیر پی چدمبرم ہیں جنہوں نے تجویز پیش کی ہے کہ لاک ڈاؤن ہٹانے کے تعلق سے فیصلہ لینے سے قبل ریاستوں سے مشاورت کی جانی چاہیے۔ پی چدمبرم نے ٹوئٹ کرتے ہوئے یہ بھی مطالبہ کیا کہ حکومت کو چاہیے کہ غریبوں کو نقد رقم فراہم کرے۔ چدامبرم نے اپنے ٹوئٹ میں کہا ’’لاک ڈاؤن کی حمایت کرنے والے پہلے لوگوں میں شامل ہونے کے ناطے میں مرکزی حکومت کی ریاستوں سے مشاورت کا خیرمقدم کرتا ہوں کہ آیا 14 اپریل کے بعد لاک ڈاؤن ہٹایا جانا چاہیے یا نہیں۔‘‘

دہلی پولیس کے اے ایس آئی میں کورونا کی تصدیق

دہلی پولیس کے ایک اسسٹنٹ سب انسپکٹر کی رپورٹ کورونا کے لئے پازیٹو پائی گئی ہے۔ اس رپورٹ کے آنے کے ساتھ ہی دہلی پولیس ڈیپارٹمنٹ میں کھلبلی مچ گئی۔ معاملہ سامنے آنے کے بعد کالکا جی پولیس کالونی کو مکمل طور سے سینیٹائز کر دیا گیا ہے کیونکہ اس اے ایس آئی کی رہائش یہیں پر ہے دہلی پولیس کے جوائنٹ کمشنر دیویش چندر سریواستو نے خبر رساں ایجنسی ’آئی اے این ایس‘ سے گفتگو کرتے ہوئے اعتراف کیا کہ دہلی پولیس کے ٹریفک یونٹ میں تعینات ایک اے ایس آئی کو کورونا پازیٹو پایا گیا ہے۔


کورونا: کرنسی نوٹوں کو استری کرنے کا منفرد طریقہ

دنیا کے بیشتر علاقوں میں کورونا وائرس کی وبا پھیلنے کے بعد پوری دنیا میں اس کے پھیلاؤ کی روک تھام کے لیے مختلف حفاظتی اقدامات کیے جا رہے ہیں۔ بعض لوگوں کا خیال ہے کہ کرنسی نوٹ بھی کورونا وائرس پھیلانے کا موجب بن سکتا ہے۔ یہی وجہ ہے کہ جارجیا نے کرنسی نوٹوں اور دھاتی سکوں کو کورونا سے پاک کے لیے ایک نیا طریقہ اختیار کیا ہے۔

سعودی عرب میں عدالتی فیصلوں پر عمل درآمد معطل

سعودی عرب کے فرماں رواں شاہ سلمان بن عبد العزيز نے ایک شاہی فرمان جاری کیا ہے جس کے تحت بعض عدالتی فیصلوں اور احکامات پر عمل درآمد معطل کر دیا گیا ہے۔ فرمان کے تحت نجی حقوق کے سلسلے میں اُن قرض نادہندگان کو عارضی طور پر فوری رہا کرنے کا حکم دیا گیا ہے جن کو عدالتی فیصلے پر عمل درآمد کرتے ہوئے حراست میں رکھا گیا تھا۔ سعودی سرکاری خبر رساں ایجنسی (ایس پی اے) کے مطابق یہ فرمان منگل کے روز جاری کیا گیا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔