روہت شرما کے مستقبل پر آج بی سی سی آئی کی میٹنگ میں ہوگا فیصلہ!

آج (3 ستمبر) ’بی سی سی آئی‘ (بورڈ آف کنٹرول فار کرکٹ ان انڈیا) کی میٹنگ ہونے والی ہے۔ اس میٹنگ میں کئی اہم مسئلوں پر غور و خوض کیا جائے گا۔ آئرلینڈ اور انگلینڈ کے خلاف شکست سے لے کر چیف سلیکٹر اجیت اگرکر کی مدت کار پر بھی فیصلہ لیا جا سکتا ہے۔ اسی میٹنگ میں روہت شرما پر بھی گفتگو ممکن ہے، کیوں کہ ان کے ریٹائرمنٹ کی خبروں نے گزشتہ ماہ انٹرنیٹ پر ہلچل مچا دی تھی۔ بی سی سی آئی کی اس میٹنگ میں بورڈ کے سکریٹری دیوجیت سیکیا، اجیت اگرکر، گوتم گمبھیر اور ’سنٹر آف ایکسیلینس‘ کے سربراہ وی وی ایس لکشمن موجود ہو سکتے ہیں۔ یہ بھی خبریں آرہی ہیں کہ شبھمن گل اور شریاس ایئر بھی اس میٹنگ میں شامل ہوسکتے ہیں۔

’کرک بز‘ کی رپورٹ کے مطابق 3 ستمبر کو ہونے والی میٹنگ میں روہت شرما کے مستقبل پر بات ہو سکتی ہے۔ دعویٰ یہ کیا گیا تھا کہ وہ لارڈز میں انگلینڈ کے خلاف ونڈے میچ کے بعد ریٹائر ہو جائیں گے۔ معاملہ اس مرحلے پر پہنچ گیا تھا کہ سلیکٹرز نے ’ہٹ مین‘ پر واضح کر دیا تھا کہ وہ 2027 کے ورلڈ کپ کے منصوبوں میں شامل نہیں ہوں گے۔ حالانکہ بی سی سی آئی سکریٹری کے بیان کے بعد سب کچھ تبدیل ہو گیا تھا۔ بی سی سی آئی کے سکریٹری دیوجیت سیکیا کا کہنا تھا کہ روہت لارڈز میں ریٹائر نہیں ہوں گے اور جب تک ٹیم کے منصوبوں میں ہیں، تب تک کھیلتے رہیں گے۔ یہ بیان سلیکشن کمیٹی کو اچھا نہیں لگا۔ رپورٹ کے مطابق سلیکٹرس روہت کو 2027 ورلڈ کپ کے منصوبوں میں شامل نہ کرنے کی بات کہہ چکے تھے۔

قابل ذکر ہے کہ روہت شرما نے انگلینڈ کے خلاف ون ڈے سریز کے پہلے 2 میچوں میں 11 رن اور 26 رن بنائے تھے، اور ریٹائرمنٹ کی خبریں عروج پر تھیں۔ پھر آخری ون ڈے میں 138 رنوں کی تاریخی پاری کھیلی، جس کے بعد روہت شرما لارڈز میدان میں ونڈے سنچری لگانے والے پہلے ہندوستانی بلے باز بن گئے۔ خبروں کے مطابق سنچری لگانے کے باوجود یہ طے نہیں ہے کہ روہت شرما ورلڈ کپ 2027 کھیلیں گے یا نہیں۔ اب روہت شرما میدان میں کب اتریں گے، یہ بڑا سوال ہے۔ بورڈ میٹنگ میں ان کے مستقبل پر بڑا فیصلہ لیا جا سکتا ہے۔ ہندوستانی ٹیم کی اگلی ونڈے سیریز اسی مہینے ویسٹ انڈیز کے خلاف کھیلی جائے گی۔ ہندوستان اور ویسٹ انڈیز کے درمیان 27 ستمبر سے 3 اکتوبر تک 3 ونڈے میچ کھیلے جائیں گے۔ دیکھنے والی بات یہ ہے کہ روہت اس سیریز کا حصہ ہوں گے یا نہیں۔ امکان ظاہر کیا جا رہا ہے کہ اس سیریز سے قبل ہی روہت شرما کے مستقبل سے متعلق فیصلہ لے لیا جائے گا۔