ومبلڈن: جوکووچ اور فیڈرر میں گراس کورٹ بادشاہت کی جنگ

لندن: عالمی نمبر ایک کھلاڑی اور گزشتہ چمپئن سربیا کے نوواک جوکووچ اور 20 گرینڈ سلیم خطاب کے فاتح سوئٹزرلینڈ کے راجر فیڈرر کے درمیان اتوار کو ومبلڈن ٹینس چمپئن شپ کی خطابی جنگ میں گراس کورٹ کی بادشاہت کا فیصلہ ہوگا۔

ٹاپ سیڈ جوکووچ چھٹی بار ومبلڈن کے فائنل میں پہنچے ہیں جبکہ دوسری سیڈ فیڈرر نے 12 ویں بار فائنل میں جگہ بنائی ہے۔ جوکووچ چار بار اور فیڈرر آٹھ بار اس گراس کورٹ ٹورنامنٹ کا خطاب جیت چکے ہیں۔ فیڈرر کے کھاتے میں 20 گرینڈ سلیم اور جوکووچ کے کھاتے میں 15 گرینڈ سلیم ٹائٹل ہیں۔

آٹھ بار کے فاتح فیڈرر نے اپنے روایتی حریف اور دوسری سیڈ اسپین کے رافیل نڈال کو 7-6 (3)، 1-6، 6-3، 6-4 سے شکست دی جبکہ اس سے پہلے جوکووچ نےا سپین کے رابرٹو بتستا اگت کو 6 -2، 4-6، 6-3، 6-2 سے شکست دی۔

جوکووچ اور فیڈرر کے درمیان کیریئر کا یہ 48 واں مقابلہ ہوگا۔ جوکووچ کو 47 مقابلوں میں فیڈرر پر 25-22 کی برتری حاصل ہے۔ سربیا کے کھلاڑی نے فیڈرر سے گزشتہ چھ مقابلوں میں پانچ میچ جیتے ہیں۔ ان دونوں کی مخاصمت اوپن دور میں دوسری سب سے زیادہ پرانی ہے۔ اس صورت میں جوکووچ اور نڈال 54 مقابلوں کے ساتھ سب سے آگے ہیں۔

نڈال اور فیڈرر کا مقابلہ سال 2008 فائنل کے بعد سے دونوں کھلاڑیوں کے درمیان پہلا مقابلہ تھا، اس وقت نڈال چمپئن رہے تھے۔ فیڈرر نے شاندار جیت کے بعد کہاکہ میں اپنے گیم پلان پر قایم رہا تھا اور جارحیت کے ساتھ مظاہرہ کیا۔ میں نے دوسرے سیٹ کے بعد اچھی سروس بھی کی۔ میں نے تیسرے اور چوتھے سیٹ میں اہم پوائنٹس بھی حاصل کئے ۔ ہمارے درمیان بہت مشکل ریلیاں بھی چلیں جس کا مجھے فائدہ ملا۔