پیرالمپکس: طلائی سے چوکے نوئیڈا کے ڈی ایم سہاس، ہندوستان کو دلایا چاندی کا تمغہ

ہندوستانی بیڈمنٹن کھلاڑی اور گوتم بدھ نگر کے ضلع مجسٹریٹ سہاس ایل یتی راج ٹوکیو پیرالمپکس کے دوران فائنل مقابلہ میں ہار گئے اور انہیں چاندی کے تمغے پر ہی اکتفا کرنا پڑا

تصویر ٹوئٹر
تصویر ٹوئٹر
user

قومی آوازبیورو

ٹوکیو: ہندوستانی بیڈمنٹن پیرا کھلاڑی اور گوتم بدھ نگر کے ضلع مجسٹریٹ سہاس ایل یتی راج ٹوکیو پیرالمپکس کے فائنل مقابلہ میں فرانس کے پیرا کھلاڑی لوکاس مزور سے ہار گئے اور انہیں چاندی کے تمغے پر ہی اکتفا کرنا پڑا۔ بیڈمنٹن کے مردوں کے سنگلز ایس ایل-4 مقابلہ کے فائنل میں میں دنیا کے سر فہرست لوکاس مزور نے 15-21، 21-17، 21-15 سے شکست دی۔ 38 سالہ سہاس نے پیرالمپکس کے بیڈمنٹن ایونٹ میں پرمود بھگت کے سونے کے بعد چاندی کا تمغہ حاصل کیا ہے۔ ان کھیلوں میں ہندوستان کے تمغوں کی تعداد 18 ہو گئی۔

پہلے گیم میں فرانسیسی کھلاڑی نے شاندار آغاز کیا اور اسکور 6-3 کر دیا۔ اس کے بعد، سہاس نے جارحانہ کھیل کا مظاہرہ کیا اور کھیل کے وقفہ کے وقت 11-8 کی برتری حاصل کر لی۔ اس کے بعد ہندوستانی کھلاڑی نے لگاتار پوائنٹس حاصل کیے اور اسکور 17-12 تک پہنچا دیا۔ لوکاس مزور نے یہاں سے 3 پوائنٹس حاصل کیے لیکن یہ گیم جیتنے کے لیے کافی نہیں تھا۔ بالآخر سہاس نے پہلا گیم 20 منٹ میں جیت کر 1-0 کی برتری حاصل کر لی۔


دوسرے گیم میں بھی مزور نے شاندار آغاز کرتے ہوئے 8-6 کی برتری حاصل کی۔ اس کے بعد سہاس نے لگاتار 5 پوائنٹس لے کر اسکور 11-8 تک پہنچا دیا۔ یہاں سے فرانسیسی کھلاڑی نے شاندار واپسی کی اور 16-16 سے برابری کی۔ اس کے بعد مزور نے مزید 2 پوائنٹس حاصل کیے اور اسکور 18-16 کر دیا۔ بالآخر لوکاس مزور نے دوسرا گیم 22 منٹ میں جیت کر میچ برابر کر دیا۔

تیسرے اور فیصلہ کن گیم میں شروع میں دونوں کھلاڑیوں کے درمیان سنسنی خیز مقابلہ ہوا۔ کھیل کے وقفے کے دوران، سہاس نے 11-10 کی معمولی برتری حاصل کی اور اس کے بعد وہ اپنی لے برقرار نہ رکھ سکے، جبکہ ان کے حریف نے مسلسل پوائنٹس حاصل کر کے 21 منٹ میں تیسرا گیم جیت لیا۔ اسی کے ساتھ ہندوستانی کھلاڑی کا طلائی تمغہ جیتنے کا خواب چکنا چور ہو گیا۔


وزیر اعظم نریندر مودی نے سہاس کے چاندی کا تمغہ جیتنے پر ان ہیں مبارکباد پیش کی ہے۔ انہوں نے ٹویٹ کیا، ’’خدمات اور کھیلوں کا شاندار سنگم! سہاس یتی راج نے اپنی غیر معمولی کارکردگی سے ہماری پوری قوم کے تصور کو اپنی لپیٹ میں لے لیا ہے۔ بیڈمنٹن میں چاندی کا تمغہ جیتنے پر مبارکباد۔ مستقبل کی کاوشوں کے لیے نیک خواہشات۔‘‘

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔