ایف آئی ایچ پرو لیگ: شاندار واپسی کے بعد ہندوستان نے پاکستان کو دی 3-4 سے شکست

لندن: ایف آئی ایچ پرو لیگ 2025-26 کے لندن مرحلے کے اپنے پہلے مقابلے میں ہندوستان نے ایک گول کے خسارے سے نکلتے ہوئے پاکستان کو سنسنی خیز مقابلے میں 3-4 سے شکست دے دی۔ ہندوستان کی جانب سے ابھیشیک، نیلاکانتا شرما، سکھجیت سنگھ اور راجندر سنگھ نے ایک ایک گول کیا، جبکہ پاکستان کے تینوں گول ندیم احمد، ابو محمود اور معین شکیل نے کیے۔

لی ویلی ہاکی اور ٹینس سینٹر میں کھیلے گئے اس مقابلے میں پاکستان نے آٹھویں منٹ میں ندیم احمد کے ذریعے برتری حاصل کر لی تھی، لیکن دوسرے کوارٹر میں ہندوستانی ٹیم نے زبردست واپسی کرتے ہوئے دو گول داغ دیے۔ تیسرے اور چوتھے کوارٹر میں ایک ایک مزید گول کے ساتھ ہندوستان نے اپنی برتری مضبوط کر لی۔ اگرچہ آخری لمحات میں دفاعی غلطیوں کی وجہ سے پاکستان نے دو گول کرکے مقابلہ دلچسپ بنا دیا، لیکن ہندوستان اپنی برتری برقرار رکھنے میں کامیاب رہا۔

کپتان ہرمن پریت سنگھ کی قیادت میں کھیلنے والی ٹیم ہر شعبے میں حریف پر حاوی رہی۔ ہندوستان نے مجموعی طور پر 30 مرتبہ حریف کے سرکل میں داخلہ حاصل کیا، جبکہ پاکستان صرف نو مرتبہ ایسا کر سکا۔ ہندوستان کو 11 پنالٹی کارنر ملے، جن میں سے دو کو گول میں تبدیل کیا گیا، جبکہ پاکستان نے اپنے تینوں گول پنالٹی کارنر کے ذریعے کیے۔

یہ ایف آئی ایچ پرو لیگ میں ہندوستان کی مسلسل تیسری کامیابی ہے۔ 13 میچوں کے بعد ٹیم کے 13 پوائنٹس ہو گئے ہیں اور وہ نو ٹیموں کی جدول میں ساتویں مقام پر پہنچ گئی ہے۔ دوسری جانب پاکستان اب تک اپنے تمام 13 مقابلوں میں شکست سے دوچار ہوا ہے اور صفر پوائنٹس کے ساتھ آخری مقام پر موجود ہے۔

ہندوستان نے اس کامیابی کے ساتھ پاکستان کے خلاف اپنی برتری کا سلسلہ بھی برقرار رکھا۔ 2016 کے بعد سے سینئر اور جونیئر سطح پر پاکستان کی کوئی ٹیم ہندوستان کو شکست نہیں دے سکی ہے۔ ہندوستانی ٹیم اب اپنے اگلے مقابلے میں میزبان انگلینڈ کا سامنا کرے گی، جبکہ 26 جون کو ایک بار پھر پاکستان کے خلاف میدان میں اترے گی۔