کامن ویلتھ گیمز: ہندوستانی پہلوانوں کا بہترین کارکردگی کا مظاہرہ، بجرنگ اور ساکشی نے جیتے طلائی تمغے

بجرنگ پونیا نے مردوں کے فری اسٹائل 65 کلوگرام زمرے کے فائنل میں کینیڈا کے میک نیل لیچلن کو شکست دے کر طلائی تمغہ جیتا، جبکہ ساکشی ملک نے بھی کینیڈین کھلاڑی کو شکست دے کر طلائی تمغہ حاصل کیا

تصویر سوشل میڈیا
تصویر سوشل میڈیا
user

قومی آوازبیورو

برمنگھم: ہندوستانی پہلوان کامن ویلتھ گیمز 2022 میں بہترین کارکردگی کا مظاہرہ کر رہے ہیں۔ خاتون پہلوان انشو ملک کے چاندی کا تمغہ جیتنے کے بعد پہلوان بجرنگ پونیا اور خاتون پہلوان ساکشی ملک ملک کے لیے طلائی تمغہ حاسل کیا۔ ہندوستان کے طلائی تمغے کی امید رکھنے والے سب سے بڑے پہلوان بجرنگ پونیا نے جمعہ کے روز کینیڈا کے میک نیل لیچلن کو شکست دے کر طلائی تمغہ جیت لیا۔

گولڈ کوسٹ 2018 گیمز کے طلائی تمغہ جیتنے والے اور ٹوکیو اولمپکس میں کانسے کا تمغہ جیتنے والے بجرنگ نے مردوں کے 65 کلوگرام کے زمرے میں فائنل میں اپنے حریف کو یکطرفہ طور پر 9-2 سے شکست دی۔ ٹوکیو اولمپکس 2020 میں کانسے کا تمغہ جیتنے والے بجرنگ نے میچ کے آغاز سے ہی دباؤ ڈالنا شروع کر دیا جبکہ لیچلن ان کے سامنے بے اثر نظر آئے۔


ادھر، 2016 ریو اولمپکس میں کانسے کا تمغہ جیتنے والی ساکشی ملک نے 62 کلوگرام کے زمرے میں طلائی تمغہ حاصل کیا۔ ساکشی ملک نے کامن ویلتھ گیمز 2022 میں طلائی تمغہ جیتنے کے لیے کینیڈا کی اینا گونزالیز کے خلاف فائنل میں شاندار واپسی کرتے ہوئے طلائی تمغہ حاصل کیا۔

ساکشی نصف اول کے اختتام تک میچ میں 4-0 سے پیچھے تھیں لیکن نصف ثانی میں انہوں نے زبردست واپسی کی۔ ساکشی نے پہلے دو بار گونزالیز کو ٹیک ڈاؤن کرکے میچ 4-4 سے برابر کر دیا، اور پھر اپنے حریف کو شکست دے کر دولت مشترکہ کھیلوں میں اپنا پہلا طلائی تمغہ جیتا۔


ہندوستان نے اب تک کشتی میں دو طلائی تمغے اور ایک چاندی سمیت تین تمغے جیتے ہیں۔ اس سے قبل انشو ملک نے خواتین کے 57 کلوگرام زمرے میں چاندی کا تمغہ جیتا تھا۔ نوجوان پہلوان انشو ملک کو خواتین کے 57 کلوگرام کے فائنل میں نائجیریا کی اوڈونائیو اڈیکورائے سے شکست کے بعد چاندی کے تمغے سے اکتفا کرنا پڑا۔ دو بار کامن ویلتھ گیمز میں گولڈ میڈل جیتنے والے اوڈونائیو نے انشو کو 6-4 سے شکست دی۔ انشو اپنی شکست کے بعد رو پڑیں۔ ان تین تمغوں کے ساتھ ہندوستان کے تمغوں کی تعداد 23 ہو گئی ہے، جس میں 8 طلائی، 8 نقرئی اور 6 کانسے شامل ہیں۔

(یو این آئی ان پٹ کے ساتھ)

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔


Published: 06 Aug 2022, 8:48 AM