ایشین گیمز: 400 میٹر ہرڈلز میں وتھیا رام راج نے تاریخ رقم کی، پی ٹی اوشا کا ریکارڈ توڑ کر جیتا ’کانسہ‘ کا تمغہ

ایشین گیمز 2026 میں پیر (28 ستمبر) کو وتھیا رام راج نے خواتین کی 400 میٹر ہرڈلز مقابلے میں ملک کے لیے کانسہ کا تمغہ جیتا۔ رام راج نے سنسنی خیز فائنل میں 54.75 سیکنڈ کے ساتھ اپنا اب تک کا پرسنل بیسٹ وقت نکالتے ہوئے تیسری پوزیشن حاصل کی۔ اسی کے ساتھ وتھیا نے معروف ہندوستانی ایتھلیٹ پی ٹی اوشا کا 42 سال پرانا نیشنل ریکارڈ توڑ دیا۔

ہندوستانی ایتھلیٹ پوری ریس کے دوران تمغہ کی دوڑ میں بنی رہیں۔ انہوں نے آخری لمحات میں بھی اپنی پوزیشن برقرار رکھی، لیکن وہ مریم کریم کا مقابلہ نہیں کر سکیں۔ متحدہ عرب امارات (یو اے ای) کی مریم کریم نے 54.31 سیکنڈ کے گیمز ریکارڈ وقت کے ساتھ طلائی تمغہ اپنے نام کیا، جبکہ قزاقستان کی ایڈیلینا جمز نے 54.58 سیکنڈ کے اپنے پرسنل بیسٹ وقت کے ساتھ چاندی کا تمغہ حاصل کیا۔ وتھیا رام راج نے 55.42 سیکنڈ کے گزشتہ نیشنل ریکارڈ میں 0.67 سیکنڈ کی بہتری کی۔ یہ ریکارڈ اوشا نے 1984 کے لاس اینجلس اولمپکس میں بنایا تھا، جہاں وہ اولمپک فائنل میں چوتھے مقام پر رہی تھیں۔

پی ٹی اوشا کا 55.42 سیکنڈ کا ریکارڈ 1984 کے لاس اینجلس اولمپکس سے قائم تھا، جس میں وہ چوتھے مقام پر رہنے کی وجہ سے معمولی فرق سے پوڈیم سے محروم رہ گئی تھیں۔ وتھیا رام راج نے 2023 میں اس ریکارڈ کی برابری کر لی تھی، لیکن ایشین گیمز 2026 میں اس میں بہتری کرتے ہوئے نیا نیشنل ریکارڈ قائم کر دیا۔ وتھیا رام راج نے اس سے قبل ایشین گیمز 2023 میں اوشا کے ریکارڈ کی برابری کرتے ہوئے کانسہ کا تمغہ اپنے نام کیا تھا۔ 3 سال بعد بالآخر وہ اس ریکارڈ سے آگے نکل گئیں، جو ہندوستانی ایتھلیٹکس میں سب سے زیادہ عرصے تک قائم رہنے والے ریکارڈز میں سے ایک تھا۔ دیگر بھارتی ایتھلیٹ انو راگھون نے بھی فائنل میں شاندار کارکردگی کا مظاہرہ کیا۔ لین 8 میں دوڑتے ہوئے راگھون نے 55.88 سیکنڈ (پرسنل بیسٹ) کے ساتھ پانچویں پوزیشن حاصل کی۔ فائنل میں پہنچنے سے قبل ان کا گزشتہ بہترین وقت 56.54 سیکنڈ تھا۔