ایشین گیمز 2026: ہندوستانی خواتین ہاکی ٹیم نے ازبکستان کو 19-0 سے دی شکست، دیپیکا نے کیے 8 گول

ہندوستانی خواتین ہاکی ٹیم نے اتوار کے روز گیفو پریفیکچرل گرین اسٹیڈیم میں اپنے پول بی کے پہلے میچ میں ازبکستان کو 19-0 سے شکست دی، اور ایشیائی کھیل 2026 میں اپنے سفر کا دھماکہ خیز انداز میں آغاز کیا ہے۔ ہندوستانی ٹیم کی جیت میں سب سے بڑی اسٹار دیپیکا رہیں، دیپیکا نے 8 گول کیے۔ اس کے علاوہ ایشیکا نے 3، لال تھنتل وانگی اور نہا نے 2-2 گول کیے۔ بلجیت کور، نونیت کور، لال ریمسیامی اور ساکشی رانا نے 1-1 گول کیا۔

دیپیکا کی ہیٹ ٹرک کی بدولت ہندوستانی خواتین ٹیم نے شاندار کارکردگی کا مظاہرہ کیا، اور ہاف ٹائم تک وہ ازبکستان کے خلاف 8-0 سے آگے تھی۔ وقفے کے بعد بھی ہندوستان ازبکستان کو گول کرنے کا کوئی موقع دینے کے موڈ میں نظر نہیں آ رہا تھا اور دیپیکا ایک بار پھر اپنی بہترین فارم میں تھیں۔ انہوں نے مسلسل 4 گول کرکے ہندوستان کی برتری 13-0 کر دی۔ اس کے بعد ایشیکا، لال تھنتل وانگی، ساکشی اور نونیت بھی ٹیم میں شامل ہوئیں۔ انہوں نے ازبکستان کی تمام امیدیں ختم کر دیں اور 19-0 سے زبردست جیت حاصل کرکے اپنی مہم کا شاندار آغاز کیا۔

ازبکستان کے ساتھ یہ مقابلہ سویتا پونیا کا 320 واں بین الاقوامی مقابلہ تھا۔ وہ وندنا کٹاریا کے ساتھ سب سے زیادہ میچ کھیلنے والی ہندوستانی خاتون ہاکی کھلاڑی بن گئی ہیں۔ بلجیت کے کیریئر کا یہ 50 واں مقابلہ تھا۔ ہندوستانی خواتین ایف آئی ایچ ہاکی ویمن ورلڈ کپ 2026 میں تاریخی پانچویں مقام پر رہنے کے بعد کافی جوش و خروش کے ساتھ ایشیائی کھیلوں میں پہنچی ہیں۔

کپتان سلیمہ ٹیٹے کی قیادت میں ہندوستانی خواتین ہاکی ٹیم 2023 کے ایشیائی کھیلوں میں جیتے کانسے کے تمغے کو سونے کے تمغے میں تبدیل کرنے کی کوشش کرے گی۔ ہندوستان کا اگلا مقابلہ پیر کے روز انڈونیشیا سے ہوگا۔ ایشیائی کھیل ہاکی ٹیموں کے لیے لاس اینجلس 2028 اولمپک کھیلوں میں جگہ بنانے کے لیے بھی انتہائی اہم ہیں۔