ایشین گیمز 2026: ہندوستان کی بیٹیوں نے ٹیبل ٹینس میں پاکستان کو دی شکست، کوارٹر فائنل میں داخل

ایشین گیمز 2026 میں ہندوستان نے پاکستان کی ٹیبل ٹینس ٹیم کو 3-0 سے شکست دے دی ہے۔ پاکستان کو شکست دینے کے بعد ہندوستان کوارٹر فائنل میں داخل ہو گیا ہے۔ ہندوستان کی خواتین ٹیم نے اپنے پہلے میچ میں انڈونیشیا کو 3-0 سے شکست دی تھی۔ اس کے بعد سنگاپور کو بھی قریبی میچ میں ہرایا اور اب تیسرے میچ میں پاکستان کو بھی شکست دے دی ہے۔ ٹیبل ٹینس ٹیم مقابلے میں بیسٹ آف-5 کو فاتح قرار دیا جاتا ہے۔ کل 5 کھیل کھیلے جاتے ہیں، جن میں زیادہ جیت حاصل کرنے والی ٹیم فاتح رہتی ہے۔ پیر کے روز پاکستان کی ٹیبل ٹینس کھلاڑی ہندوستانی ٹیم کے سامنے ٹک نہیں سکیں۔

پہلے گیم میں سوتیرتھا مکھرجی نے صرف 10 منٹوں کے اندر علینہ خان کو 11-3، 11-3، 11-4، کے فرق سے شکست دے دی۔ دوسرے گیم میں سنڈریلا داس نے کلثوم خان کا برا حال کر دیا اور 11-6، 11-7، 11-5 سے سیدھے سیٹوں میں جیت درج کی۔ ہندوستان کو اس مقابلے میں 2-0 کی برتری مل چکی تھی۔ تیسرا مقابلہ سریجا اکولا اور فاطمہ خان کے مابین ہوا۔ سریجا نے فاطمہ خان کو 11-4، 11-4، 11-5 سے شکست دی۔ اس کے بعد باقی 2 مقابلوں کی ضرورت ہی نہیں پڑی، کیوں کہ ہندوستان نے 5 میں سے تینوں گیم جیت کر مقابلہ اپنے نام کر لیا۔

ہندوستان نے گروپ ایف میں اپنے تینوں میچ جیت کر کوارٹر فائنل میں جگہ بنا لی ہے۔ 2022 کے ایشین گیمز میں ہندوستان کی خواتین ٹیم راؤنڈ آف 16 میں ہی باہر ہو گئی تھی۔ اس بار ہندوستان کی بیٹیوں نے کمال کر دیا ہے اور اب تک پورے مقابلے میں ناقابل شکست رہی ہیں۔