کبڈی: ہندوستانی خواتین کو ملا نقرئی، طلائی تمغہ پر ایران کا قبضہ

جکارتہ: دو مرتبے کی چیمپئن ہندستانی خاتون کبڈی ٹیم کو بھی مضبوط ایران کے خلاف جمعہ کو ایشیائی کھیلوں میں اپنی بادشاہت گنوانی پڑ گئی۔

یو این آئی

ذہانت سے بھر پور مقابلے میں ایران نے ہندستان کو 24-27 کے فرق سے ہرا دیا۔ اس طرح ہندستان کو سونے کے تمغے کے اس مقابلے میں چاندی کے تمغے پر اکتفا کرنا پڑا۔

18 ویں ایشیائی کھیلوں میں جہاں کبڈی مقابلے میں ہندستان کے دو طلائی یقینی مانے جا رہے تھے وہاں اس کی مردانہ اور زنانہ دونوں ٹیموں کو الٹے نتائج کا سامنا کرنا پڑ گیا۔ جمعرات کو سات بار کی چیمپئن ہندستانی مردوں کی ٹیم کو ایران کے ہاتھوں سیمی فائنل میچ میں 18-27 سے شکست ہوگئی تھی۔ اس طرح ٹیم فائنل میں پہنچ ہی نہیں سکی۔

خواتین نے فائنل میں داخل ہوکر طلائی تمغے کی توقع بندھا رکھی تھی لیکن حاوی انداز میں شروعات کے باوجود اتار چڑھاؤ سے بھرے میچ میں ایران کی خواتین نے کمال کی حکمت عملی دکھاتے ہوئے میچ محض تین پوائنٹس کے فرق سے جیت کر طلائی تمغہ اپنے نام کرلیا۔