چین کا خطرہ، تائیوان دفاع مضبوط کرنے پر مجبور

پارلیمنٹ میں خطاب کرتے ہوئے تائیوان کے قومی سلامتی بیورو کے ڈائریکٹر جنرل چن منگ ٹونگ نے کہا کہ تائیوان کے خلاف اس نئی چینی حکمت عملی میں ڈرون طیاروں کا استعمال اور نفسیائی دباؤ ڈالنے جیسے حربے بھی شامل ہیں۔

تائیوان کی قومی سلامتی بیورو کے چیف کے مطابق وہ یوکرین پر مسلط کی گئی روسی جنگ اور چین کے عزائم کو انتہائی غور سے مانیٹر کر رہے ہیں تاکہ کسی کارروائی کی صورت میں بیجنگ کو مؤثر جواب دیا جا سکے اور وہ اس صورتحال کا مقابلہ کرنے کے لیے پہلے سے ہی تیار ہوں۔

چین نے اگست میں امریکی ایوان نمائندگان کی اسپیکر نینسی پیلوسی کی تائی پے کے دورے کے موقع پر تائیوان کے ارد گرد فوجی مشقوں کا آغاز کیا تھا جو تاحال جاری ہیں تاہم ان کی شدت میں کمی واقع ہوئی ہے۔

چن نے کہا، ''رواں سال کمیونسٹ فورسز نے تائیوان کے خلاف 'ہائبرڈ وار فیئر' کا آغاز کرنے اور اپنی جنگی صلاحیتوں کو مستحکم بنانے کے لیے روس کی یوکرین میں جارحیت کی مثال سے سیکھنے کی کوشش کی ہے۔

چین نے اگست کے بعد تائیوان کے خلاف 'گرے زون‘ اور ہائبرڈ سرگرمیوں کو بڑھایا ہے۔ چین نے ڈرونز کا استعمال بھی کیا جو تائیوان کے زیر کنٹرول جزیروں کے قریب اور تائیوان کے فضائی دفاعی زون میں پرواز کر تے رہے تھے۔

تائیوان کا کہنا ہے کہ چین کی اس 'گرے زون‘ جنگی مہم میں جنگ کا اعلان کیے بغیر دشمن کو پسپا کرنے کے لیے کئی ہتھکنڈے شامل ہیں جس میں تائیوان کے فضائی دفاعی علاقوں میں کثرت سے پرواز کرنا اور تائیوان کی فضائیہ کو اپنی موجودہ پوزیشنوں سے پیچھے ہٹنے پر مجبور کرنا شامل ہیں۔

انہوں نے ایک ویڈیو کا حوالہ دیتے ہوئے کہا کہ چین نے تائیوان کی فورسز کی تصاویر بھی جاری کی ہیں تاکہ تائیوان حکومت پر دباؤ ڈالا جا سکے۔ یہ ویڈیوز چینی سوشل میڈیا پر اگست میں تائیوان کے فوجیوں کی سمندری جزیروں پر ڈرون کے ذریعے لی گئی تھی۔

چن نے مزید کہا کہ یہ سرگرمیاں اس بات کا ثبوت ہیں کہ چین نے گرے زون سرگرمیوں میں اضافہ کیا ہے جس سے تائیوان کی قومی سلامتی کو شدید خطرہ لاحق ہے۔

چین میں موجود تائیوانی امور کے دفتر نے فوری طور پر ان بیانات پر تبصرہ نہیں کیا ہے۔ تاہم چین کی جانب سے یہ الزام عائد کیا جا رہا ہے کہ اس سرحدی تناؤ کا ذمے دار تائیوان ہے جو اس جزیرے کی باضابطہ آزادی کے لیے بیجنگ کے خلاف غیر ملکی افواج کے ساتھ 'گٹھ جوڑ‘ میں مصروف ہے۔ دوسری جانب تائیوان چین کی ان بڑھتی ہوئی سرگرمیوں کے پیش نظر اپنا دفاعی نظام مضبوط بنانے کی کوشش میں ہے۔