اسپین میں سائنس فیسٹیول کے دوران دھماکہ، اٹھارہ افراد زخمی

اسپین میں ایک سائنس فیسٹیول کے دوران ہونے والے دھماکے میں تقریبا 18 افراد زخمی ہو چکے ہیں۔ یہ حادثہ گزشتہ روز بارسلونا کے شمال مشرق میں تقریباً 100 کلومیٹر کے فاصلے پر واقع جیرونا کے شہر کاتالان کے ہاؤس آف کلچر میں ایک سائنسی تجربے کے مظاہرے کے دوران پیش آیا۔

زخمی ہونے والے افراد میں کچھ کی حالت تشویشناک ہے۔ اس حادثے کے نتیجے میں دس کم عمر بچے بھی زخمی ہوئے ہیں جن کی عمریں تین سے 13 سال کے درمیان ہیں۔

حکام کے مطابق یونیورسٹی آف جیرونا کی جانب سے منعقد کیے گئے اس سائنسی میلے میں ایک مظاہرے کے دوران مائع نائٹروجن کا ایک کنٹینر پھٹ گیا۔ اس موقع پر ناظرین میں 200 سے 300 افراد موجود تھے۔

حکام نے اس بات کی بھی تصدیق کی ہے کے زخمی ہونے والے افراد جھلسنے سے بچ گئے ہیں تاہم دھاتی کنٹینر کے پھٹنے سے اس کے ٹکڑے وہاں موجود لوگوں کو لگے، جس کے باعث کئی لوگ زخمی ہوئے۔ زخمی ہونے والوں میں ایک پانچ سالہ بچی کو سب سے زیادہ چوٹیں آئی ہیں۔

اس بچی سمیت چار دیگر شدید زخمی افراد جیرونا کے ہسپتال میں زیر علاج ہیں۔ زخمی افراد میں 10 اور 12 سال کی عمر کے دو دیگر بچے، ایک 47 سالہ خاتون اور ایک 31 سالہ مرد شامل ہیں۔ باقی افراد جنہیں معمولی چوٹیں آئیں تھیں انہیں علاج کے بعد گزشتہ شب گھر جانے کی اجازت دے دی گئی تھی۔

متلقہ یونیورسٹی کے ترجمان سلواڈور مارٹی نے یقین دلایا کہ مائع نائٹروجن کے ساتھ پہلے بھی کئی تجربات بغیر کسی پریشانی کے کیے جا چکے ہیں اور اس سے پہلے کبھی ایسا کوئی حادثہ نہیں ہوا۔ انہوں نے کہا، '' یہ سمجھ سے باہر ہے کہ اس بار حادثہ کیوں پیش آیا۔‘‘ مارٹی نے کہا کہ کاتالان پولیس اس بابت اپنی تحقیقات جلد شروع کرے گی۔