جرمنی: ایک تربیتی اسکول کے استاد کا سترہ سالہ قاتل گرفتار

جرمنی کے مغربی شہر مؤنسٹر کے دفتر استغاثہ نے ایک ووکیشنل یا تربیتی اسکول میں ہونے والے قتل کے اس واقعے کی اطلاعات عام کرتے ہوئے کہا ہے کہ سترہ سالہ لڑکے نے استاد کو قتل کرنے کے بعد خود کو پولیس کے حوالے کر دیا۔

منگل گیارہ جنوری کو مغربی جرمن شہر مؤنسٹر کے حکام نے بتایا کہ اس شہر کے قصبے ایبن بئیورن میں ایک سترہ سالہ لڑکے کو اپنے استاد کے قتل کے الزام میں گرفتار کر لیا گیا ہے۔ فائرنگ کا واقعہ ایک ووکیشنل یا تربیتی اسکول میں پیش آیا۔ اس اسکول میں کام کرنے والے ایک 55 سالہ استادکو قتل کرنے کے بعد قاتل لڑکے نے خود پولیس کو بلایا اور بغیر کسی مزاحمت کے خود کو پولیس کے حوالے کر دیا۔

تفتیش کاروں کا کہنا ہے کہ منگل کو یہ واقعہ جس وقت پیش آیا اُس وقت تربیتی اسکول کے کلاس روم میں ٹیچر اکیلا تھا۔ نوجوان لڑکے نے مبینہ طور پر چاقو سے حملہ کر کے ٹیچر کو ہلاک کر دیا۔ اس تمام مجرمانہ کارروائی میں جرم کے محرک،استادکے اکیلے ہونے کی وجہ اور مشتبہ حملہ آور کو ٹیچر کے تنہا ہونے کی خبر کیسی ہوئی؟ یہ تمام سوالات جواب طلب ہیں اور ان کے بارے میں اب تک کوئی معلومات موصول نہیں ہوئیں۔

جائے واردات پر پولیس کی کئی ایک گاڑیاں، ایک ریسکیو ہیلی کاپٹر اور ایک کلیسا کی ایمرجنسی سروس موجود تھی۔ ایک پولیس ترجمان کے مطابق مشتبہ قاتل کو جلد ہی جج کے سامنے پیش کیا جائے گا۔

یاد رہے کہ ایک طالب علم کو اس وقت مغربی جرمن شہر ایسن میں اپنے اسکول میں بڑے پیمانے پر فائرنگ کرنے کی منصوبہ بندی کرنے کے مقدمے کا سامنا ہے۔ اس پر عائد فرد جرم کے مطابق وہ اساتذہ اور شاگردوں کو نشانہ بنانا چاہتا تھا۔