'پاکستان تحریک انصاف شرپسندوں کا گروہ ہے'

پاکستانی میڈیا رپورٹوں کے مطابق پہلا اجلاس وزیر اعظم شہباز شریف کی صدارت میں ہوا جس میں وزرا اور حکمران اتحادی جماعتوں کے نمائندوں نے شرکت کی اور یہ تقریباً پانچ گھنٹے جاری رہا۔

وزیر دفاع خواجہ آصف کے مطابق دوسرا اجلاس ایک گھنٹہ جاری رہا اور اس میں چیف آف آرمی اسٹاف جنرل عاصم منیر اور انٹر سروسز انٹیلیجنس (آئی ایس آئی) کے ڈائریکٹر جنرل لیفٹیننٹ جنرل ندیم انجم نے بھی شرکت کی۔

ان میٹنگوں کے بعد جاری ایک سرکاری بیان کے مطابق ان دونوں اجلاس میں عمران خان کی صدارت والی پاکستان تحریک انصاف پارٹی کی جاری احتجاجی تحریک کے متعلق انتہائی ناموافق نقطہ نظر کا اظہار کیا گیا۔ ان دونوں اجلاسوں میں شرکاء نے پرتشدد مظاہروں اور سرکاری اور نجی املاک کی توڑ پھوڑ میں ملوث افراد کے خلاف سخت کارروائی کرنے پر اتفاق کیا۔

بیان کے مطابق دونوں میٹنگوں میں شرکاء نے پاکستان تحریک انصاف (پی ٹی آئی) کو "سیاسی جماعت کے بجائے کالعدم تنظیموں کے تربیت یافتہ شرپسندوں کا گروہ " قرار دیا اور اس کے خلاف قانون کے مطابق کارروائی کرنے کا عزم کیا۔

بیان میں کہا گیا ہے کہ میٹنگ کے شرکاء نے عدالتی احکامات کی تعمیل کرانے والے پولیس اور رینجرز پر حملوں کی شدید مذمت کی اور اسے ریاست کے خلاف دشمنی قرار دیا گیا۔ "حملہ آوروں نے پولیس اہلکاروں کو بری طرح مارا پیٹا، سرکاری گاڑیوں کو آگ لگادی، پولیس کے خلاف پٹرول بموں کا استعمال کیا اور بدامنی پیدا کی۔"

بیان میں مزید کہا گیا ہے کہ، "ایسے تمام شواہد اور ثبوت دستیاب ہیں جس کے تحت بدامنی میں ملوث افراد کے خلاف سخت کارروائی کی جائے گی۔" ان اعلیٰ سطحی میٹنگوں میں مسلح افواج اور عدلیہ سمیت ریاستی اداروں کو 'کردار کشی کی مہم‘ کے ذریعے بدنام کرنے میں ملوث افراد کے خلاف کارروائی کرنے کا بھی فیصلہ کیا گیا۔ اجلاس میں سوشل میڈیا پر فوج اور آرمی چیف کے خلاف مہم کی مذمت کی گئی اور لوگوں پر زور دیا گیا کہ وہ اس کا حصہ نہ بنیں۔

بیان میں کہا گیا ہے کہ آنے والے دنوں میں پی ٹی آئی کے مزید رہنماوں اور کارکنوں کو گرفتار کیا جائے گا۔پیر کے روز بھی سابق وزیر اعظم عمران خان کے حامیوں کی گرفتاریوں کا سلسلہ جاری رہا۔ خبر رساں ادارے روئٹرز کے مطابق ہفتے کے روز سے پیر تک عمران خان کے گرفتار حامیوں کی تعداد 159 ہو گئی ہے۔ صرف دارالحکومت اسلام آباد میں ہی 59 افراد کو گرفتار کیا گیا ہے۔

پی ٹی آئی کے کارکنوں اور پولیس کے درمیان تصادم میں 50 سے زائد سکیورٹی اہلکار زخمی ہوئے ہیں جب کہ متعدد کاروں اور موٹرسائیکلوں کو آگ لگا دی گئی۔

عمران خان نے پیر کے روز ایک ٹویٹ کرکے کہا کہ ہفتے کے روز اسلام آباد کی عدالت میں ان کی مجوزہ پیشی دراصل انہیں قتل کرنے کا ایک اور منصوبہ تھا۔ انہوں نے ٹویٹ میں کہا، "میں یہ انکشاف کروں گا کہ کس طرح مجھے موت کے جال میں پھنسایا گیا تھا اور عدالتی کمپلکس کے اندر مجھے مارنے کا منصوبہ بنایا گیا تھا۔"