آپ کا بینک اکاؤنٹ اچانک بھر جائے تو آپ کا ردعمل کیا ہو گا؟

اس مقدمے میں فیصلہ شمالی جرمن شہر ہینوور کی ایک عدالت نے آج پیر چوبیس اگست کے روز سنایا۔ یہ واقعہ گزشتہ برس جولائی کے وسط میں پیش آیا تھا۔ اس شخص کی عمر اس وقت 35 سال کے قریب ہے۔ گزشتہ برس اس کے بینک اکاؤنٹ میں 'کسی نے‘ ایک لاکھ 70 ہزار یورو (تقریباﹰ دو لاکھ دو ہزار ڈالر) غلطی سے منتقل کر دیے تھے۔

یہ رقم ٹرانسفر کرنے والی اسی بینک کی ایک خاتون کسٹمر تھی، جو اپنے گھر کی تعمیر کے لیے ایک تعمیراتی کمپنی کو یہ رقم ادا کرنا چاہتی تھی۔ آن لائن ٹرانسفر کے دوران اس خاتون کی ایک غلطی کی وجہ سے اتنی بڑی رقم اس جرمن شہری کے اکاؤنٹ میں چلی گئی تھی۔ اس شخص کا نام اس کے نجی کوائف کے قانونی تحفظ کے پیش نظر ظاہر نہیں کیا گیا۔

صرف تین روز میں بانوے ہزار یورو اڑا دیے

یہ شخص اچانک اتنی بڑی رقم اپنے اکاؤنٹ میں دیکھ کر اتنا خوش ہوا تھا کہ اس نے 92 ہزار یورو صرف تین دن میں ہی خرچ کر دیے تھے۔ اس دوران اس نے 36 ہزار یورو ہوٹلنگ پر خرچ کیے، 15 ہزار یورو کا جؤا کھیلا اور تقریباﹰ 19 ہزار یورو سیکس ورکرز کو بھی ادا کیے۔

بینک کو جب اس غلطی کا علم ہوا، تو اس کسٹمر کو یہ رقم واپس کرنے کے لیے کہا گیا۔ مگر اس کا کہنا تھا کہ وہ تو اس کا بہت بڑا حصہ خرچ بھی کر چکا ہے اور ان تقریباﹰ پونے دو لاکھ یورو میں سے 50 ہزار یورو تو مبینہ طور پر چوری بھی ہو چکے تھے۔ بینک کے پاس اس کے سوا کوئی دوسرا راستہ نہیں تھا کہ اس شخص کے خلاف مقدمہ درج کرا دیا جائے۔

'پہلے نہیں سوچا تھا، تو اب سوچو‘

اب اس مقدمے میں عدالت نے اپنے فیصلے میں کہا ہے کہ صرف یہ دلیل کافی نہیں کہ ملزم یہ رقم خرچ کر چکا ہے۔ اس لیے کہ اس شخص کو سوچنا چاہیے تھا کہ یہ رقم اس کے اکاؤنٹ میں کیسے اور کیوں آئی اور یہ کہ اسے یہ پوری کی پوری رقم واپس بھی کرنا پڑ سکتی تھی۔

اس شخص نے تو مگر ایسے کسی پہلو پر غور کرنے کا تردد ہی نہیں کیا تھا۔ اس لیے عدالت نے اسے حکم دیا ہے کہ وہ یہ ساری رقم بینک کو واپس کرے۔ یوں اس جرمن شہری نے اپنا اکاؤنٹ بھرا ہوا دیکھ کر یہ تو نہیں سوچا تھا کہ یہ رقم آئی کہاں سے، لیکن اب اسے یہ بات بڑی دیر تک سوچنا ہو گی کہ واپس بینک کو ادا کرنے کے لیے اتنی بڑی رقم آئے گی کہاں سے؟