بوٹسوانا میں ایک اور بہت بڑا ہیرا دریافت

افریقی ملک بوٹسوانا میں کان کنی کرنے والی ایک غیر ملکی کمپنی نے اعلان کیا ہے کہ اسے ایک کان سے ایک بہت بڑا ہیرا ملا ہے۔ یہ ہیرا کینیڈا کی کان کنی کی کمپنی لوکارا کو 12 جون کو ملا تھا تاہم اسے بوٹسوانا کی ملکی کابینہ کے سامنے بدھ سات جولائی کو پیش کیا گیا۔

لوکارا ڈائمنڈ کمپنی کی ڈائریکٹر نسیم لہری نے بوٹسوانا کے دارالحکومت گابارونے میں میڈیا سے گفتگو کرتے ہوئے کہا، ''یہ تاریخ بن رہی ہے، ہمارے لیے بھی اور بوٹسوانا کے لیے بھی۔‘‘ ان کا مزید کہنا تھا کہ نیا دریافت ہونے والا ہیرا پنے سائز کے اعتبار سے دنیا کا تیسرا سب سے بڑا ہیرا ہے اور اس کا وزن 1,174 قیراط ہے۔

نسیم لہری کا اس موقع پر مزید کہنا تھا کہ اس ہیرے نےیکم جون کو بوٹسوانا میں ہی ملنے والے ہیرےکی جگہ لے لی ہے، جسے اُس وقت دنیا کا تیسرا بڑا ہیرا قرار دیا گیا تھا۔ اُس کا وزن 1,098 قیراط تھا۔

دنیا بھر میں ملنے والے دس سب سے بڑے ہیروں میں سے چھ بوٹسوانا میں ہی ملے، اس طرح یہ افریقی ملک سب سے بڑے ہیرے ملنے والے ممالک کی درجہ بندی میں سرفہرست ہے۔ ویسے بھی بوٹسوانا ہیرے پیدا کرنے والا دنیا کا سب سے بڑا ملک ہے۔

اب تک دنیا کا سب سے بڑا ہیرا جنوبی افریقہ میں 1905 میں ملا تھا اور اس کا وزن 3,106 قیراط تھا۔

بوٹسوانا کے صدر موکگویسٹی ماسیسی نے بدھ کے روز اس ہیرے کے ملنے کو ایک اہم پیشرفت قرار دیتے ہوئے اس کا خیرمقدم کیا۔