کینیڈا، ’ایک افغان مہاجر پھوٹ پھوٹ کر رونے لگا‘

ایک طرف سعادت خود کو خوش قسمت قرار دے رہے ہیں کہ انہیں کینیڈا میں نئی زندگی کی شروعات کا موقع مل رہا ہے ساتھ ہی وہ پیچھے رہ جانے والوں کا سوچ کر رو رہے ہیں۔

ٹورونٹو پہنچنے پر خبر رساں ادارے اے ایف پی سے بات چیت میں محمد احسان سعادت نے کہا، ''جولائی کے شروع ہی سے میں نے افغانستان چھوڑنے کا سوچنا شروع کر دیا تھا۔ مگر میں نے یہ نہیں سوچا تھا کہ طالبان اتنے جلدی کابل پر قبضہ کر سکتے ہیں۔

اتوار کے روز افغان صدر اشرف غنی کے ملک سے فرار ہو جانے کے بعد طالبان نے کابل میں صدارتی محل پر قبضہ کر لیا تھا اور بیس برس بعد افغانستان کا کنٹرول دوبارہ اپنے ہاتھ میں لے لیا تھا۔ سن 2001 میں افغانستان پر امریکی حملے کے بعد طالبان کی حکومت کا خاتمہ ہوا تھا۔

طالبان کی جانب سے پیش قدمی میں تیزی آئی تھی تو کینیڈین وزیراعظم جسٹن ٹروڈو نے 20 ہزار افغان مہاجرین کو قبول کرنے کا اعلان کیا تھا۔ احسان کا تحقیقی کام 'کرپشن، خواتین کے حقوق، انسانی حقوق اور حقوقِ اطفال‘ پر ہے، اور اسی تناظر میں انہیں لگتا ہے کہ وہ طالبان کا ہدف بن سکتے ہیں۔

ان کی سیاسی پناہ کی درخواست پر فیصلہ ریکارڈ ایک ہفتے کے اندر اندر ہو گیا ۔ وہ اب کینیڈا میں قانونی طور پر سکونت اختیار کر سکتے ہیں۔ ''یہ ناقابل یقین تھا۔ ہمیں اس پر بہت خوشی ہے۔ ‘‘

فوراﹰ ہی پورے خاندان نے بوریا بسترا لپیٹا اور کینیڈا پہنچ گئے۔ ان کی اہلیہ کی خواہش ہے کہ وہ کینیڈا میں ڈرائیونگ سیکھیں جب کہ وہ خود کو انگریزی سیکھنے کے لیے بھی رجسٹرڈ کروانے کا ارادہ رکھتی ہیں۔

سعادت اس وقت دیگر بین الاقوامی مسافروں کی طرح 14 روز کے قرنطینہ دورانیہ گزار رہے ہیں، تاہم وہ کہتے ہیں، ''میں کبھی کبھی کھڑکی کے سامنے کھڑے ہو کر سوچتا ہوں کہ میں یہاں کیسے پہنچا؟ میں کتنا خوش قسمت ہوں کہ اب میں افغانستان میں نہیں ہوں۔‘‘