ہندوستان میں 5جی کال کی کامیاب آزمائش، وزیر مواصلات نے ملائی پہلی کال

ہندوستان میں جلد ہی 5G سروس شروع ہونے والی ہے اور اس سے قبل وزیر مواصلات نے کامیابی کے ساتھ پہلی 5G کال ملائی، حکومت اس سال ملک کو 4G سے 5G میں اپ گریڈ کرنے کی کوشش کر رہی ہے

ہندوستان میں 5جی کی کامیاب آزمائش
ہندوستان میں 5جی کی کامیاب آزمائش
user

قومی آوازبیورو

نئی دہلی: ہندوستان میں 5G کال کا کامیاب تجربہ کیا گیا ہے۔ انفارمیشن ٹکنالوجی اور مواصلات کے مرکزی وزیر اشونی ویشنو نے آئی آئی ٹی مدراس میں 5G کی کامیاب آزمائش کے حوالہ سے معلومات فراہم کی۔ ہندوستان میں لوگ طویل عرصے سے 5G نیٹ ورک کا انتظار کر رہے ہیں اور حکومت اس سال ملک کو 4G سے 5G میں اپ گریڈ کرنے کی پوری کوشش کر رہی ہے۔

ایسے میں سوال یہ آتا ہے کہ 5G کے آنے کے بعد کیا تبدیلی آئے گی۔ گزشتہ روز کی گئی 5جی کال کی آزمائش میں ویڈیو کالنگ بھی شامل ہے۔ اس حوالہ سے حکومت نے کئی منصوبوں پر کروڑوں روپے خرچ کیے ہیں۔

وہیں، نجی ٹیلی کام آپریٹرز بھی 5G کی آزمائش کر رہے ہیں۔ تاہم، ابھی تک 5G سپیکٹرم نیلامی کے آغاز کی کسی تاریخ کا اعلان نہیں کیا گیا ہے۔ حالیہ رپورٹس کے مطابق اس سال کے آخر تک ملک میں 5G نیٹ ورک دستیاب ہوگا۔


ملک میں 2000 کی دہائی میں 3G نیٹ ورک کا استعمال شروع ہو تھا، جبکہ پچھلی دہائی میں لوگوں نے 4G کا استعمال شروع کیا۔ دونوں کی رفتار اور کوریج دونوں میں بہت بڑا فرق ہے۔ ہم 4G اور 5G میں بھی یہی فرق دیکھیں گے۔ آئیے جانتے ہیں کہ 5G میں کیا خاص ہوگا!

یقینی طور پر 5G نیٹ ورک پر آپ کو 4G سے زیادہ رفتار ملے گی، جہاں آپ 4G نیٹ ورک پر 100Mbps تک کی رفتار حاصل کرتے ہیں، وہیں 5G پر آپ کو 10 گنا زیادہ رفتار مل سکے گی یعنی آپ کی رفتار جی بی پی ایس میں پہنچ جائے گی۔ تاہم، فی الحال صرف لو بینڈ 5G نیٹ ورک دستیاب ہوں گے، جس میں آپ کو 1 سے 2 جی بی پی ایس کی رفتار ملے گی۔ یعنی آپ فلم کو صرف چند سیکنڈ میں ڈاؤن لوڈ کر سکیں گے۔


4G نیٹ ورک کی آمد کے بعد بھی بہت سے علاقے ایسے ہیں جہاں نیٹ ورک کی رسائی نہیں ہے۔ 5G کے ذریعے ٹیلی کام کمپنیوں کو اپنے نیٹ ورک کی حد بڑھانے کا ایک اور طریقہ ملے گا۔ تاہم، ابھی اس کی شروعات ہو رہی ہے اور اسے مزید شہروں تک پہنچنے میں وقت لگے گا۔ یعنی 5G سروس ہندوستان میں شروع تو ہو جائے گی لیکن چھوٹے شہروں تک پہنچنے میں وقت لگے گا۔

رپورٹس کے مطابق 5G کی رفتار 4G سے 10 گنا زیادہ ہوگی۔ یعنی صارفین ہائی کوالٹی، الٹرا ہائی ریزولوشن 4K ویڈیو کالز کر سکیں گے۔ 5G پر آپ کو 4G کے مقابلے میں بہتر کنیکٹیویٹی اور کالنگ کی سہولت حاصل ہوگی۔

نئی 5G سروس کی آمد کے بعد آپ انٹرنیٹ کی سست رفتار سے آزاد ہو جائیں گے۔ اس کے ساتھ آپ ایچ ڈی کوالٹی میں آڈیو اور ویڈیو کالنگ بھی کر سکیں گے۔ آپ وائی فائی نیٹ ورک کے بغیر بھی ویڈیو اسٹریمنگ اور ویڈیو چیٹ کا فائدہ اٹھا سکیں گے۔ فون پر گیمنگ کا تجربہ بھی پہلے سے بہت بہتر ہو جائے گا۔

Follow us: Facebook, Twitter, Google News

قومی آواز اب ٹیلی گرام پر بھی دستیاب ہے۔ ہمارے چینل (qaumiawaz@) کو جوائن کرنے کے لئے یہاں کلک کریں اور تازہ ترین خبروں سے اپ ڈیٹ رہیں۔