انگلینڈ کے اسکولوں میں موبائل فون پر سخت پابندی کی تیاری، طلبہ پورے دن فون سے رہیں گے دور

لندن: انگلینڈ میں اسکولوں میں موبائل فون کے استعمال اور انہیں اپنے پاس رکھنے کے حوالے سے ستمبر 2027 سے سخت سرکاری ہدایات نافذ ہونے جا رہی ہیں۔ نئے ضوابط کے تحت طلبہ اسکول کے پورے دورانیے میں اپنے پاس موبائل فون نہیں رکھ سکیں گے۔ بی بی سی ہندی کی رپورٹ کے مطابق، اس اقدام کا مقصد طلبہ کی توجہ تعلیم پر مرکوز رکھنا اور اسکولوں میں باہمی میل جول کو فروغ دینا ہے۔

حکومت کی جانب سے جاری کردہ رہنما خطوط کے مطابق اسکولوں اور انہیں چلانے والے ٹرسٹوں کی یہ قانونی ذمہ داری ہوگی کہ وہ پورے تعلیمی دن کے دوران اسکول کو موبائل فون سے پاک رکھیں۔ اس کا مطلب ہے کہ طلبہ صرف کلاس روم ہی نہیں بلکہ اسکول کے دیگر حصوں میں بھی موبائل فون تک رسائی حاصل نہیں کر سکیں گے۔

فی الحال بعض اسکولوں میں طلبہ کو موبائل فون اپنے بستوں میں رکھنے کی اجازت ہے، تاہم اس کے لیے شرط ہے کہ فون نہ تو دکھائی دے اور نہ ہی اس کی آواز سنائی دے۔ نئے ضوابط کے تحت اس طرح کی گنجائش بھی ختم ہو جائے گی اور طلبہ کو اسکول کے پورے وقت میں اپنے فون سے دور رہنا ہوگا۔

تعلیم کی وزیر لوسی پاول نے اس معاملے پر حکومت کا موقف واضح کرتے ہوئے کہا کہ والدین اور بچوں کے لیے حکومت کا پیغام بالکل صاف ہے کہ اسکول پڑھائی اور دوستی کے لیے ہیں، نہ کہ موبائل فون پر مسلسل اسکرولنگ کرنے کے لیے۔

حکومت کا کہنا ہے کہ موبائل فون تک مسلسل رسائی بچوں کی تعلیمی سرگرمیوں میں خلل ڈال سکتی ہے۔ اس سے نہ صرف ان کی پڑھائی پر توجہ متاثر ہوتی ہے بلکہ طلبہ کے درمیان براہ راست میل جول اور سماجی تعلقات بھی کمزور پڑ سکتے ہیں۔ حکومت اسی وجہ سے اسکولوں کو مکمل طور پر موبائل فون سے پاک بنانے کی پالیسی پر عمل درآمد چاہتی ہے۔

نئے ضوابط کے نفاذ کا طریقہ کار طے کرنے کا اختیار اسکولوں کو دیا جائے گا۔ اس سلسلے میں مختلف اسکول پہلے ہی اپنے طور پر اقدامات کر رہے ہیں۔ بعض تعلیمی اداروں میں موبائل فون رکھنے کے لیے ایسے خصوصی پاؤچ استعمال کیے جا رہے ہیں جنہیں مقفل کیا جا سکتا ہے، جبکہ کچھ اسکول محفوظ لاکرز کی سہولت فراہم کر رہے ہیں۔

اس کے علاوہ متعدد اسکول دن کے آغاز میں ہی طلبہ سے ان کے موبائل فون جمع کر لیتے ہیں، جبکہ کچھ اداروں نے طلبہ کے اسکول میں موبائل فون لانے پر مکمل پابندی عائد کر رکھی ہے۔

واضح رہے کہ برطانیہ میں تعلیم سے متعلق پالیسی اور فیصلے مختلف علاقوں کی حکومتیں خود کرتی ہیں۔ اسی لیے موبائل فون کے حوالے سے انگلینڈ، اسکاٹ لینڈ، ویلز اور شمالی آئرلینڈ میں ضوابط یکساں نہیں ہیں۔ اسکاٹ لینڈ نے بھی اس سلسلے میں نیا قانون متعارف کرانے کا عندیہ دیا ہے، جبکہ ویلز اور شمالی آئرلینڈ میں اس معاملے پر عوامی رائے حاصل کی جا رہی ہے۔