اسپیڈ بریکر کے لگنے سے بچوں کا تحفظ یقینی ہوا: ڈاکٹر معروف خان

نئی دہلی: جنتا کالونی وارڈ کے تحت نیو جعفرآباد میں بی بلاک کا مین مصروف روڈ پرعام آدمی پارٹی کے سرگرم لیڈر پریم بابو سکسینہ کی خصوصی جدو جہد کے نتیجہ میں مقامی آر ڈبلیو اے نے اسپیڈ بریکر لگا کر طلبا وطالبات اور عام طور پر تحفظ فراہم کر کے بڑا کام انجام دیا ہے۔

افتتاح آل انڈیا مسلم ایکتا کمیٹی کے چیئرمین حاجی اکرام حسن، ڈاکٹر ذاکرحسین اسکول کے پرنسپل ڈاکٹر محمد معروف خان، آر ڈبلیو اے کے صدر جلال فاروقی، حاجی آزاد، حاجی محمد عرفان، حاجی شکیل احمد، محمد معروف، بھورے خان، ڈاکٹر محمد اطہر پرویز، موصوف خان عرف ننھے وغیرہ کے ہاتھوں عمل میں آیا، جس سے مقامی لوگوں نے راحت کی سانس لی ہے۔

اس موقع پر حاجی اکرام حسن نے کہا کہ کالونیوں کے تحفظ و ترقی اور بنیادی سہولیات کی فراہمی کے لئے مقامی تنظیموں کا اہم دخل ہوتا ہے، مگر مقامی لوگوں کا تعاون بھی بے حد ضروری ہے، تبھی کالونی کی ترقی اور لوگوں کا تحفظ ممکن ہے۔

آر ڈبلیو اے کے صدر جلال فاروقی نے کہا کہ بی جے پی کونسلر اجے شرما سے بنیادی سہولتوں کی فراہیمی کے لئے کہا جاتا ہے، مگر ان کے سوتیلے رویہ کی وجہ سے ایک مخصوص طبقہ مسائل سے دوچار رہتا ہے اور بریکر کے لئے بھی متعدد مرتبہ کہا گیا، مگر کونسلر نے لوگوں کی پریشانی کا خاتمہ کرنے کے لئے کوئی دلچسپی نہیں لی۔

انہوں نے مزید کہا کہ حفظان تحفظ کے لئے روڈ پر اسپیڈ بریکر کا مطالبہ شدت اختیار کرتا جا رہا تھا جس کے تعلق سے عام آدمی پار ٹی کے مقامی سرگرم لیڈر پریم بابو سکسینہ کو بتایا گیا جن کی خصوصی جدوجہد سے اسپیڈ بریکر لگانے کا افتتاح عمل میں آیا ہے۔

ڈاکٹر محمد معروف خان نے کہا کہا کہ اسپیڈ بریکر لگ جانے سے روڈ کراس کرنے میں بچوں کا تحفظ یقینی ہوا ہے، جبکہ اس سے قبل عدم بریکر کی صورت میں سرک حادثہ ہونا عام بات تھی، اسی وجہ سے لوگ اپنے بچوں کے تئیں فکرمند رہتے تھے اور اسپیڈ بریکر سے کراسنگ کرنے میں تحفظ یقینی ہوگیا ہے، جس کے لئے آر ڈبلیو اے مبارک باد کی مستحق ہے۔