’علی گڑھ تحریک کو فروغ دینا وقت کا تقاضا‘، راحت ابرار نے علی گڑھ مسلم یونیورسٹی میں پیش کیا خصوصی خطبہ

علی گڑھ: آج یہاں ’مرکزِ پیشہ ورانہ فروغ برائے اردو اساتذہ‘ (اردو اکادمی) کے زیرِ اہتمام یومِ سر سید کے موقع پر ایک خصوصی خطبہ بعنوان ’علی گڑھ تحریک کی صداقت‘ کا انعقاد عمل میں آیا۔ اسے ممتاز سر سید شناس ڈاکٹر راحت ابرار نے پیش کیا۔ جلسہ کی صدارت اردو اکادمی کے ڈائریکٹر ڈاکٹر زبیر شاداب خان نے فرمائی۔

ڈاکٹر راحت ابرار نے خطبہ پیش کرتے ہوئے کہا کہ تعلیمی امور میں سر سید کے عمل اور افکار و نظریات نے علی گڑھ تحریک کی صورت اختیار کی، جس کی معنویت اور افادیت کا اعتراف ہر دور میں کیا گیا، اور آج بھی اس کی معنویت وہی ہے جو پہلے تھی۔ انہوں نے مزید کہا کہ علی گڑھ تحریک کے اغراض و مقاصد کو فروغ دینا وقت کا تقاضا ہے۔ سر سید نے زندگی کے تمام شعبہ جات میں اپنا نقش چھوڑا۔ ان کا شمار جدید ہندوستان کے معماروں میں ہوتا ہے۔ سر سید 1857ء کے واقعات، حادثات اور حالات کی پیداوار تھے۔ ان کی سیاسی بصیرت ہی تحریک کی فکری جہت میں نمایاں کردار ادا کرتی ہے۔

ڈاکٹر زبیر شاداب خان نے اپنے صدارتی کلمات میں سر سید کو وقت کا سب سے بڑا نباض اور مستقبل شناس قرار دیا۔ انہوں نے کہا کہ سر سید نے مسلمانوں کے لیے جدید تعلیم کی ضرورت پر زور دیا تاکہ وہ سائنس اور عصری علوم سے حد درجہ واقف ہو سکیں۔ انہوں نے یہ بھی کہا کہ علی گڑھ تحریک کا ایک اہم مقصد مسلمانوں کے اقتصادی و معاشی حالات اور تہذیبی اقدار کو فروغ دینا تھا۔ نیز مسلمانوں میں سیاسی شعور بیدار کرنے کے لیے بھی اس تحریک نے ایک کلیدی کردار ادا کیا۔

اس جلسہ کی نظامت ڈاکٹر مشتاق صدف نے کی اور تقریب کا آغاز ڈاکٹر عرفان احمد کی تلاوتِ قرآنِ پاک سے ہوا۔ اس موقع پر جانی فاسٹر نے ’علی گڑھ‘ پر ایک خوبصورت نظم پیش کی، جبکہ پروفیسر خورشید احمد، پروفیسر ضیاء الرحمان صدیقی، ڈاکٹر ابو صالح، ڈاکٹر عمر رضا، ڈاکٹر معید رشیدی، ڈاکٹر رفیع الدین، ڈاکٹر مامون رشید، ڈاکٹر ابو بکر صدیقی وغیرہ کے علاوہ طلبا و طالبات نے بطورِ خاص شرکت کی۔