رابعہ گرلز اسکول میں ’اٹل ٹنکرنگ لیب‘ کا افتتاح

سابق وزیر اعظم محترم اٹل بہاری واجپئی کا خواب تھا کہ بچے صرف کتابوں سے نہ پڑھیں بلکہ سائنس او ر تکنیکی صلاحیتوں میں آگے بڑھیں۔ بے کار، بے مصرف چیزوں سے بھی نئی ایجادات کریں۔ ان کے اس خواب کو شرمندۂ تعبیر کرنے کے لیے مرکزی حکومت نے نیتی آیوگ کے تحت اسکولوں میں ’اٹل ٹنکرنگ لیب‘ شروع کرنے کا پروگرام بنایا اور پورے ہندوستان کے اسکولوں سے درخواستیں منگائی گئیں۔ پورے ہندوستان سے 1500 اسکول منتخب کیے گئے جس میں پرانی دہلی واقع رابعہ گرلز پبلک اسکول بھی شامل ہے۔

اٹل ٹنکرنگ لیب کے لیے رابعہ اسکول کو سرکاری امداد فراہم کی گئی ہے۔ ایل بی ڈی روبوٹک پرائیویٹ لمیٹڈ کے ذریعے طالبات کی تکنیکی صلاحیتوں میں اضافہ کیا جائے گا ۔ ان کی رہنمائی کے لیے چار ٹرینرز معین ہیں جو ٹنکرنگ یعنی جگاڑ کے ذریعے نئی ایجادات کا زندگی میں استعمال بتائیں گے۔

رابعہ اسکول کی سینیر ٹیچر محترمہ زیبا ایاز صاحبہ اور ان کی گیارہ ٹیچرز کی ٹیم اسکول میں اس مشن کو فروغ دے گی۔ آج بروز جمعرات 30 اگست 2018 کواسکول میں اس ٹنکرنگ لیب کا افتتاح کیا گیا جس میں مہمانِ خصوصی کی حیثیت سے دہلی یونیورسٹی کے پروفیسر اور ڈین محترم ایچ۔ پی۔ سنگھ صاحب نے شرکت کی۔ ایچ ۔پی۔ ایس کی منیجر، ڈاکٹر ذکیہ صدیقی ، کریسنٹ اسکول کی وائس پرنسپل ، محترمہ فوزیہ صاحبہ بھی موجود تھیں۔ پروفیسر ایچ۔ پی۔ سنگھ نے پرانی دہلی میں واقع رابعہ اسکول میں سائنس اور تکنیکی بیداری کے اس مشن میں لڑکیوں کے بڑھتے ذوق و شوق کو دیکھ کر بہت مسرت کا اظہا ر کیا اور کہا یقینا سائنس اورٹیکنالوجی میں ہندوستان کا مستقبل بہت روشن ہے۔

پروگرام کے اختتام پر اسکول کی پرنسپل محترمہ ناہید عثمانی صاحبہ نے مہمانان کا شکریہ ادا کیا اوراس بات پر بہت خوشی کا اظہار کیا کہ پورے ہندوستان سے منتخب کیے جانے والے چند اسکولوں میں رابعہ اسکول ایک ہے اور پرانی دہلی کا پہلا اسکول ہے جو اس مشن میں شامل ہے۔