سابق مرکزی وزیر محسنہ قدوائی کے انتقال پر انجمن ترقی اردو میں تعزیتی نشست کا انعقاد

نئی دہلی: انجمن ترقی اردو (ہند) نئی دہلی کے صدر پروفیسر صدیق الرحمن قدوائی کی ہمشیرہ اور سابق مرکزی وزیر اور کانگریس کی بزرگ ترین رہنما محسنہ قدوائی کا 7 اپریل 2026 کی شب طویل علالت کے بعد نوئیڈا میں انتقال ہو گیا۔ ان کی عمر 94 برس تھی۔ ان کے انتقال سے ادبی اور سیاسی دنیا میں غم کا ماحول ہے۔

محسنہ قدوائی ایک علم دوست شخصیت تھیں اور سبھی کے ساتھ بڑی خندہ پیشانی اور محبت سے پیش آتی تھیں۔ ان کے انتقال سے علمی اور سیاسی حلقوں میں جو خلا پیدا ہو گیا ہے، وہ تادیر پُر نہ ہو سکے گا۔ وہ اپنی تمام تر مصروفیات کے باوجود انجمن ترقی اردو (ہند) کے پروگراموں میں شرکت کرتی تھیں اور انجمن کے ترقیات اردو کے منصوں کو بہ نظر تحسین دیکھتی تھیں۔ ان خیالات کا اظہار ان کے انتقالِ پُرملال پر انجمن ترقی اردو (ہند) نئی دہلی میں منعقد تعزیتی نشست میں اطہر فاروقی (جنرل سکریٹری انجمن ترقی اردو (ہند)، نئی دہلی) نے کیا۔

اطہر فاروقی نے کہا کہ محسنہ قدوائی کے انتقال سے ہم ایک ایسے سرپرست سے محروم ہو گئے ہیں جن کے مشوروں سے ہمیں حوصلہ ملتا تھا اور انجمن کے کام کو خوش اسلوبی سے انجام دینے کی ہمیں ترغیب ملتی تھی۔ اس موقعہ پر انجمن کے تمام اراکین نے ان کی مغفرت کے لیے دعا کی۔

قابل ذکر ہے کہ محسنہ قدوائی کی پیدائش یکم جنوری 1932 کو بارہ بنکی (اتر پردیش) کے ایک باوقار علمی خانوادے میں ہوئی تھی۔ ان کی شخصیت میں اودھی اور لکھنوی تہذیب رچی بسی تھی۔ وہ اعلیٰ انسانی اور اخلاقی اقدار کا عملی نمونہ تھیں۔ محسنہ قدوائی نے آنجہانی وزیر اعظم اندرا گاندھی کے ساتھ اپنا سیاسی کیریئر شروع کیا تھا اور وہ ان کے ساتھ وزیر بھی رہیں۔ بعد میں انھیں راجیو گاندھی کابینہ میں بھی شامل کیا گیا۔ وہ 1977 سے 1989 تک لوک سبھا اور 2004 سے 2016 تک راجیہ سبھا کی رکن رہیں۔ وہ مرکزی حج کمیٹی کی چیئرپرسن بھی رہیں۔ چند برس پہلے ان کی سوانح عمری انگریزی، ہندی اور اردو تینوں زبانوں میں شائع ہوئی ہے، جسے معروف انگریزی صحافی رشید قدوائی نے ترتیب دیا ہے۔