سرنا، او آر پی اور ’آدیواسیت‘ پر زور... کمار رانا

’’خبردار! مردم شماری کا کام شروع ہو چکا ہے۔ گنتی کرنے والے آپ پر دباؤ ڈال سکتے ہیں کہ آپ اپنا مذہب ہندو بتائیں۔ لیکن ایسا ہرگز نہ کریں۔ اپنا مذہب ’سرنا‘ بتائیں۔ سرنا آدیواسیوں (قبائلیوں) کی شناخت ہے۔ ہمیں اس سے الگ نہیں ہونا چاہیے۔‘‘ پورے جھارکھنڈ میں اس طرح کی مہم چل رہی ہے اور اس کی گونج کوئی بھی سن سکتا ہے۔

جھارکھنڈ اور آس پاس کی ریاستوں میں آدیواسیوں کی مردم شماری میں سرنا کو الگ خانے میں شامل کرنے کا طویل عرصے سے چلا آ رہا مطالبہ مرکزی حکومت کی ’دیگر مذاہب اور عقائد‘ (او آر پی) زمرہ (کوڈ 7) کو ختم کرنے کی تجویز کے ساتھ ایک بار پھر زور پکڑ رہا ہے۔ کئی آدیواسی تنظیمیں اس تجویز کو آر ایس ایس اور اس سے وابستہ تنظیموں کی ان مطالبات کا ہی حصہ مانتی ہیں جن میں آدیواسی عیسائیوں کو درج فہرست قبائل کے زمرے سے ’ہٹانے‘ کی بات کی جاتی ہے۔

جیسا کہ ایک آدیواسی کارکن نے مئی کے وسط میں دمکا میں ایک نکڑ سبھا میں کہا کہ یہ ’’آدیواسیوں پر حملہ ہے جو تیزی سے اپنی الگ شناخت کا دعویٰ کر رہے ہیں۔‘‘ ان کے مطابق حکومت نہ صرف سرنا شناخت کے مطالبے کو مسترد کر رہی ہے بلکہ او آر پی زمرے کے تحت موجود آدیواسی مذہبی شناخت کے لیے محدود جگہ کو بھی ختم کر رہی ہے۔ اس تجویز کو آدیواسی شناخت اور آئینی تحفظات، دونوں کو کمزور کرنے کی کوشش کے طور پر دیکھا جا رہا ہے۔ نتیجتاً، الگ سرنا کوڈ کا مطالبہ ’آدیواسیّت‘ یا قبائلی برادری پر زور دینے کے طور پر ایک بڑا مطالبہ بن گیا ہے۔ اس مہم کو جھارکھنڈ کے باہر بھی حمایت ملی ہے۔ جش پور، چھتیس گڑھ میں ہونے والی بڑی ریلی میں بھی یہی بات کہی گئی۔

اس کے برعکس حکومت سے وابستہ تنظیموں نے آدیواسیوں کو ہندو برادری میں شامل کرنے کی کوششیں تیز کر دی ہیں۔ 24 مئی کو نئی دہلی میں جن جاتی سیکورٹی منچ (جے ایس ایم) کی ایک ریلی میں نعرہ تھا ’تو-میں ایک خون، ون واسی-گرام واسی-نگر واسی، ہم سب بھارت واسی۔‘ ان تنظیموں کا ’آدیواسی‘ کی جگہ ’ون واسی‘ لفظ کا استعمال قابل غور ہے کیونکہ یہ آدیواسیوں کے اصل باشندہ ہونے کے دعوے کو مسترد کرتا ہے۔ اس پروگرام کے مرکزی مقرر وزیر داخلہ امت شاہ نے بھی مسلسل ’ون واسی‘ لفظ کا استعمال کیا۔ اس لیے آدیواسیوں کے خدشات بے بنیاد نہیں ہیں۔ او آر پی کو ختم کرنے کی تجویز، ووٹر لسٹ سے نام حذف کرنے کی مہم اور سرنا زمرے کو تسلیم کرنے سے انکار، اگر ان سب کو ایک ساتھ دیکھا جائے تو یہ شناخت، نمائندگی اور طاقت کی سیاست میں دانستہ مداخلت محسوس ہوتی ہے۔

اب آبادیاتی پس منظر کو دیکھیں۔ 2011 کی مردم شماری کے مطابق تقریباً 79.4 لاکھ ہندوستانی، یعنی ملک کی آبادی کا 0.66 فیصد، او آر پی کے تحت شمار کیے گئے تھے۔ ان کی سب سے زیادہ تعداد جھارکھنڈ (42.4 لاکھ)، مدھیہ پردیش (6 لاکھ)، چھتیس گڑھ (4.9 لاکھ)، اوڈیشہ (4.8 لاکھ) اور اروناچل پردیش (3.6 لاکھ) میں تھی۔ پورے ملک میں او آر پی زمرے کے تحت سرنا سب سے بڑا مقامی مذہب ہے۔ 2011 میں او آر پی سے وابستہ تمام افراد میں تقریباً 62.5 فیصد سرنا عقیدے کے پیروکار تھے۔ اگر ’ساری دھرم‘ کے ماننے والوں کو بھی شامل کر لیا جائے، جن کی سماجی بنیاد (خصوصاً سنتھال) اتنی ہی بڑی ہے، تو یہ حصہ اور بھی زیادہ ہو جاتا ہے۔ اس کے مقابلے میں اگلا سب سے بڑا زمرہ گونڈ/گونڈی اور ساری دھرم (جنہیں الگ رکھا گیا) کا تھا، جن کی تعداد صرف 12.9 فیصد تھی۔

ان اعداد و شمار کی سیاسی اہمیت جھارکھنڈ میں سب سے زیادہ واضح ہوتی ہے۔ ریاست میں او آر پی کے تحت 42.4 لاکھ افراد درج کیے گئے، جو اس کی آبادی کا 12.84 فیصد ہیں۔ ان میں سے 41.3 لاکھ سے زیادہ افراد سرنا ہیں، جو ریاست کی او آر پی آبادی کا 97.5 فیصد بنتے ہیں۔ جھارکھنڈ کے آدیواسیوں میں سرنا ماننے والوں کی تعداد ہندوؤں سے کہیں زیادہ ہے۔ اس آبادیاتی حقیقت کے بڑے سیاسی مضمرات ہیں۔ جھارکھنڈ مکتی مورچہ (جے ایم ایم) جیسی علاقائی پارٹیوں کو اپنی شناخت اور حق خود ارادیت کے سوالات سے پہچان ملی ہے۔ الگ سرنا کوڈ کا مطالبہ اسی کی ایک مثال ہے۔ دراصل جھارکھنڈ میں سرنا شناخت کے ساتھ وابستگی 1991 اور 2001 کی مردم شماری میں بھی واضح طور پر نظر آتی ہے۔

مشرقی اور وسطی ہندوستان میں بی جے پی کی وسیع توسیع کے باوجود جھامومو قیادت والے اتحاد کی مسلسل انتخابی کامیابی آدیواسی شناخت کی مضبوط سیاسی قوت کو ظاہر کرتی ہے۔ اس تناظر میں او آر پی کو ختم کرنا محض ایک مردم شماری زمرے کو ختم کرنا نہیں ہے۔ اگر سرنا عقیدے کے پیروکاروں کو ہندو یا دوسرے مذاہب کے تحت اپنی شناخت درج کرانے پر مجبور کیا جاتا ہے تو سرکاری اعداد و شمار میں ان کی اجتماعی موجودگی ختم ہو جائے گی۔ ایسا قدم اس دعوے کو تقویت دے گا کہ آدیواسی دراصل ہندو مذہب کا حصہ ہیں، جبکہ ایک الگ مقامی باشندہ شناخت کے گرد سیاسی صف بندی کی آبادیاتی بنیاد کمزور ہو جائے گی۔ اس طرح انتخابی کامیابی کے اعتبار سے بی جے پی کو فائدہ پہنچے گا۔

اس کا اثر جھارکھنڈ سے بھی آگے جاتا ہے۔ مغربی بنگال میں بھی او آر پی کی معقول آبادی موجود ہے جہاں بی جے پی نے ان آدیواسیوں میں اچھی رسائی حاصل کی ہے جن کی جھارکھنڈ کے آدیواسیوں کے ساتھ ثقافتی، لسانی اور خاندانی مماثلت ہے۔ 2011 کی مردم شماری کے مطابق ریاست میں تقریباً دس لاکھ افراد او آر پی کے تحت شمار کیے گئے تھے، جن میں سرنا اور ساری دھرم کے ماننے والوں کی تعداد زیادہ تھی۔ یہ بی جے پی کی آدیواسی حکمت عملی میں ایک تضاد کی طرف اشارہ کرتا ہے۔ اگرچہ پارٹی نے آدیواسیوں کے درمیان اپنی حمایت میں اضافہ کیا ہے، لیکن ان میں سے کئی برادریاں ہندو مذہب سے باہر اپنی مذہبی شناخت برقرار رکھے ہوئے ہیں۔ جھارکھنڈ کا تجربہ دکھاتا ہے کہ کس طرح مذہبی شناخت کے مطالبات ثقافتی خود مختاری، سیاسی نمائندگی اور مقامی باشندوں کے حقوق کے وسیع تر دعوؤں میں تبدیل ہو سکتے ہیں، جو ثقافتی یکسانیت اور سیاسی غلبے کے منصوبوں کو چیلنج کرتے ہیں۔

یہ تنوع آدیواسی سیاست میں ایک ممکنہ دراڑ بھی پیدا کرتا ہے۔ سرنا مرکز تحریک کو تمام آدیواسیوں کی اجتماعی امنگوں کے بجائے مقامی باشندوں کے حقوق کے صرف ایک علاقائی دھارے کی نمائندگی کے طور پر دیکھا جا سکتا ہے۔ اگرچہ سرنا جھارکھنڈ، اڈیشہ، مغربی بنگال، بہار اور چھتیس گڑھ کے بعض حصوں میں مقامی باشندہ مذہبی دعوے کی ایک نمایاں علامت بن چکا ہے، لیکن یہ واحد مقامی عقیدہ و روایت نہیں ہے۔ شمال مشرقی ہندوستان ایک بالکل مختلف منظر پیش کرتا ہے۔

اروناچل پردیش میں او آر پی آبادی کے تقریباً 90 فیصد افراد خود کو ’دونی پولو‘ سے وابستہ مانتے ہیں۔ منی پور میں 95 فیصد سے زیادہ افراد اپنی شناخت ’سنامہی‘ کے پیروکار کے طور پر کرتے ہیں۔ میگھالیہ میں مقامی برادریاں خاصی، نیامترے اور سونگسریک روایات کی پیروکار ہیں، جبکہ ناگالینڈ کی او آر پی آبادی میں ’ہیراکا‘ روایت کا غلبہ ہے۔ سکّم میں کئی مقامی برادریاں ’’یوماسام‘‘ اور اس سے متعلق روایات کو مانتی ہیں۔ یہ مذاہب مخصوص لسانی، ثقافتی اور تاریخی پس منظر سے جڑے ہوئے ہیں اور سرنا تحریک سے الگ ارتقا پذیر ہوئے ہیں۔ اسی وجہ سے سرنا اپنے آپ پورے ہندوستان کے مقامی باشندوں کے لیے ایک مشترکہ مذہبی شناخت کا کردار ادا نہیں کر سکتا۔

نئی دہلی میں جے ایس ایم کانفرنس میں شمال مشرق کے آدیواسی گروہوں کی معقول شرکت دیکھی گئی۔ اگرچہ اسے عوامی سطح پر ’ایک آدیواسی ثقافت‘ اور ’قومی یکجہتی‘ کے جشن کے طور پر پیش کیا گیا، لیکن اس نے یہ بھی ظاہر کیا کہ مختلف آدیواسی برادریوں کو مقامی مذہبی دعوے کے علاوہ دیگر بنیادوں پر بھی متحرک کیا جا سکتا ہے۔

ایسی صف بندی کی حکمت عملی کی اہمیت یہ ہے کہ اس میں ہندوستان کی آدیواسی آبادی کے اندر موجود علاقائی اختلافات کو نمایاں کرنے کی صلاحیت ہے۔ اگر سرنا کو بنیادی طور پر ایک جھارکھنڈ مرکز منصوبے کے طور پر پیش کیا جاتا ہے (اور دیکھا جاتا ہے)، جبکہ شمال مشرق کی برادریاں اپنے الگ راستوں پر چلتی رہیں، تو ایک متحد مقامی باشندہ سیاسی پلیٹ فارم کے امکانات کافی کمزور ہو جاتے ہیں۔ جھارکھنڈ سے لے کر اروناچل پردیش تک پھیلی ہوئی مقامی مذہبی شناخت کی ایک وسیع تحریک، ثقافتی ہم شکل سازی کے منصوبوں کے لیے ایک سخت چیلنج ثابت ہو سکتی ہے۔ مختلف آدیواسی روایات کو مقامی باشندہ یکجہتی کے ایک وسیع تر فریم ورک کے اندر متحد کیا جا سکتا ہے یا نہیں، اس سے قطع نظر آدیواسیوں کی مذہبی شناخت کا مسئلہ صرف آدیواسیوں ہی کا معاملہ نہیں سمجھا جا سکتا۔ یہ جمہوریت کے تمام حامیوں کے لیے تشویش کا موضوع ہونا چاہیے۔

(کمار رانا ایک ریسرچ اینالسٹ ہیں)