پاکستان: ڈیرہ اسماعیل خان کے اسپتال پر خود کش حملہ، 9 افراد ہلاک

اسلام آباد: پاکستان کے صوبہ خیبر پختونخوا کے جنوبی شہر ڈیرہ اسماعیل خان (ڈی آئی خان) میں اتوار کے روز اسپتال کے احاطے میں خودکش حملے اور پولس پر فائرنگ کے دوران 9 افراد ہلاک جبکہ 35 افراد زخمی ہوئے ہیں۔ زخمیوں میں متعدد کی حالت تشویشناک بتائی جا رہی ہے اور ہلاک شدگان کی تعداد میں میں اضافے کا خدشہ ظاہر کیا گیا ہے۔ ہلاک ہونے والوں میں پولس اہلکار بھی شامل ہیں۔

ڈی آئی خان کے پولس افسر سلیم ریاض نے اسپتال میں میڈیا کو بتایا ہے کہ نامعلوم حملہ آوروں نے پہلے نواحی علاقے کوٹلہ سیدان میں پولس چوکی پر فائرنگ کی۔ سلیم ریاض نے مزید کہا ہے کہ پولس چوکی پر حملے میں دو اہلکار ہلاک ہوئے ہیں۔ ہلاک ہونے والے اہلکاروں کی لاشیں جب سول اسپتال لائی گئیں تو ایک برقع پوش خاتون نے خود کش حملہ کیا۔

پولس افسر نے مزید کہا ہے کہ مبینہ حملہ آور خاتون نے جسم سے بندھے بارودی مواد میں دھماکہ کیا۔ جس سے اسپتال میں موجود اہلکار سمیت عام شہری ہلاک اور زخمی ہوئے ہیں۔ ضلعی پولس افسر سلیم ریاض نے دونوں واقعات میں تین پولس اہلکاروں سمیت نو افراد کے ہلاک ہونے کی تصدیق کی۔

بی بی سی اردو کی رپورٹ کے مطابق ایک سوال کے جواب میں ان کا کہنا تھا کہ ابتدائی تفتیش کے مطابق دھماکے میں لگ بھگ سات کلو گرام بارودی مواد استعمال کیا گیا جبکہ دھماکے کی جگہ سے ایک خاتون کے بال اور پیر ملے ہیں۔ ان کا کہنا تھا کہ حملہ آور خاتون تھی یا نہیں یہ جاننے کے لیے ڈی این اے ٹیسٹ کروایا جائے گا۔

دوسری جانب تحریک طالبان پاکستان (ٹی ٹی پی) نے حملے کی ذمہ داری قبول کرلی ہے۔ واضح رہے کہ ماضی قریب میں ڈیرہ اسماعیل خان اور اطراف کے علاقوں میں ایسے واقعات ہوتے رہے ہیں۔ جن میں پولس سمیت دیگر سیکورٹی فورسز کے اہلکار اور شہری ہلاک ہوئے ہیں۔