شاہد خاقان عباسی نے حلف اٹھا لیا

مسلم لیگ (ن) کے شاہد خاقان عباسی 221 ووٹ لے کر ملک کے اٹھارویں وزیراعظم منتخب ہوگئے۔

شاہد خاقان عباسی کے مد مقابل پیپلزپارٹی کے امیدوار سید نوید قمر نے 47، تحریک انصاف کے امیداور شیخ رشید نے 33 اور جماعت اسلامی کے صاحبزادہ طارق اللہ نے 4 ووٹ حاصل کیے۔

شاہد خاقان عباسی نے وزارت عظمیٰ کا انتخاب جیتنے کے بعد اسمبلی میں موجود اراکین سے فرداً فرداً مصافحہ کیا۔

نومنتخب وزیراعظم شاہد خاقان عباسی آج ہی ایوان صدر میں حلف اٹھائیں گے جہاں صدر مملکت ممنون حسین ان سے حلف لیں گے۔

تقریب حلف برداری میں وزرائے اعلیٰ، سفارتکار، سابق وفاقی وزیرا، عسکری حکام اور اعلیٰ عدلیہ کے جج صاحبان شریک ہوں گے جب کہ سابق وزیراعظم میاں نوازشریف کی بھی تقریب میں شرکت کا امکان ہے۔