پاکستان: عمران خان کی گرفتاری کے بعد جل اٹھے کچھ شہر، اسلام آباد اور لاہور میں زبردست ہنگامہ، دیکھیں ویڈیو

پاکستان میں سابق وزیر اعظم عمران خان کی گرفتاری کے خلاف ان کے حامیوں نے پاکستان کے کئی شہروں میں زبردست ہنگامہ شروع کر دیا ہے۔ کئی شہروں میں سڑکوں پر زبردست آتشزدگی دیکھنے کو مل رہی ہے۔ پاکستان تحریک انصاف کے حامی جگہ جگہ سڑکوں پر اتر پر آگ زنی اور ہنگامہ کر رہے ہیں۔ اسلام آباد میں کئی مقامات سے آگ زنی کی ویڈیو منظر عام پر آئی ہے، اور لاہور میں بھی خوب ہنگامہ ہو رہا ہے۔ کچھ مقامات پر ہنگامہ کر رہے عمران حامیوں کا پولیس سے تصادم بھی ہوا ہے۔

میڈیا رپورٹس کے مطابق اسلام آباد اور لاہور کے بعد سندھ میں بھی عمران حامیوں نے ہنگامہ برپا کر دیا ہے جسے روکنے کے لیے پولیس نے بھیڑ پر آنسو گیس کے گولے داغے ہیں۔ پاکستان کے دوسرے کئی شہروں سے بھی تشدد کی خبریں آ رہی ہیں۔ مانا جا رہا ہے کہ عمران حامیوں کا ہنگامہ پورے ملک میں پھیل سکتا ہے اور پھر ابھی جو کچھ شہر جلتے ہوئے دکھائی دے رہے ہیں، یہ نظارہ مزید وسعت اختیار کر سکتا ہے۔

اس سے قبل آج ایک ہائی وولٹیج ڈرامہ میں اسلام آباد ہائی کورٹ میں پیشی کے لیے عمران خان کو پاکستان رینجرس نے کورٹ میں گھس کر گرفتار کر لیا۔ واقعہ کی وائرل ویڈیو میں دیکھا جا سکتا ہے کہ رینجرس کٹہرا باکس کے شیشے کو توڑ کر عمران کو حراست میں لے رہے ہیں۔ بعد میں پاک رینجرس دھکا دیتے ہوئے عمران کو عدالت کے باہر لے گئے اور اپنی گاڑی میں بٹھایا۔