پاکستان: شہباز شریف نے وزیراعظم کے عہدے کا حلف اٹھا لیا

ایوان صدر میں ہونے والی تقریب میں قائم مقام صدر صادق سنجرانی سے نومنتخب وزیراعظم شہبازشریف نے حلف لیا۔ ذرائع کے مطابق ایوان صدر میں نومنتخب وزیراعظم کی تقریب حلف برداری ہوئی، تقریب میں اعلیٰ سول و عسکری قیادت، مریم نواز، حمزہ شہباز، مولانا فضل الرحمان، بلاول بھٹو، یوسف رضا گیلانی و دیگر شریک ہوئے۔ شہباز شریف پاکستان کے 23 ویں وزیراعظم منتخب ہوگئے۔

خیال رہے کہ آج قومی اسمبلی میں ہونے والے اجلاس میں شہباز شریف نے قائد ایوان کے انتخاب میں 174 ووٹ حاصل کیے تھے۔ واضح رہے کہ ایوان صدر کے مطابق صدر مملکت عارف علوی علیل ہوگئے ہیں اور ڈاکٹر نے صدرمملکت کے معائنے کے بعد انہیں چند روز آرام کرنے کا مشورہ دیا ہے۔ صدر مملکت ڈاکٹر عارف علوی کی علالت اور مختصر رخصت کے بعد چیئرمین سینیٹ صادق سنجرانی نے قائم مقام صدر کی ذمہ داریاں سنبھالی ہیں۔

پاکستان میں تحریک عدم اعتماد کے ذریعے عمران خان کے اقتدار سے بے دخل ہونے کے بعد پاکستان مسلم لیگ نواز کے صدر شہبازشریف کو ملک کا وزیر اعظم منتخب کر لیا گیا تھا۔ پاکستان تحریک انصاف (پی ٹی آئی) کے چیئرمین عمران خان کو پاکستان کے وزیراعظم کے عہدے سے ہٹائے جانے کے بعد اپوزیشن کے مشترکہ امیدوار شہباز شریف کو ملک کے 23ویں وزیراعظم منتخب کئے گئے۔

قومی اسمبلی میں نئے قائد کے انتخاب میں پاکستان مسلم لیگ نواز (پی ایم ایل-این) کے صدر شریف کے حق میں 174 ووٹ ڈالے گئے۔ ووٹنگ کے عمل سے پہلے، عمران خان کی پارٹی پی ٹی آئی کے اراکین پارلیمنٹ نے ’اپوزیشن‘ جماعتوں کے رہنماؤں اور امریکہ کے خلاف نعرے لگاتے ہوئے قومی اسمبلی سے واک آؤٹ کیا۔ اس سے قبل پی ٹی آئی نے اپنی جانب سے عمران حکومت میں وزیر خارجہ رہنے والے شاہ محمود قریشی کو وزارت عظمیٰ کا امیدوار بنانے کا اعلان کیا تھا۔