پاکستان میں عید الفطر اتوار کے روز منائے جانے کا اعلان

پاکستان میں رویت ہلال کمیٹی کے طویل اجلاس کے بعد آخرکار شوال کے چاند کی رویت کا اعلان کر دیا گیا ہے اور ملک بھر میں عید کل بروز اتوار منائی جائے گی

تصویر سوشل میڈیا
تصویر سوشل میڈیا
user

قومی آوازبیورو

اسلام آباد: پاکستان کی مرکزی رویت ہلال کمیٹی کے طویل اجلاس کے بعد آخرکار شوال کا چاند نظر آنے کا اعلان کر دیا، ملک بھر میں عید الفطر کل یعنی بروز اتوار منائی جائے گی۔

پاکستان میں شوال کا چاند دیکھنے کے لئے مرکزی رویت ہلال کمیٹی کا اجلاس کراچی میں مفتی منیب الرحمان کی سربراہی میں منعقد ہوا۔ اجلاس کے بعد مفتی منیب الرحمان نے اعلان کیا کہ شوال کا چاند نظر آ گیا ہے اور ملک میں کل بروز اتوار 24 مئی کو عیدالفطر منائی جائے گی۔

پاکستانی میڈیا کے مطابق، رویت ہلال کمیٹی کے اجلاس میں محکمہ موسمیات کے ماہرین بھی شریک ہوئے۔ علاوہ ازیں دیگر صوبوں میں بھی زونل رویت ہلال کمیٹیوں کے اجلاس منعقد کئے گئے، جہاں سے شہادتیں مرکزی رویت ہلال کمیٹی کو بھیجی گئیں۔

پاکستان کے وفاقی وزیر سائنس و ٹیکنالوجی فواد چوہدری نے پہلے ہی یہ دعویٰ کر دیا تھا کہ پاکستان میں عید الفطر اتوار 24 مئی کو ہوگئی۔ فواد کے اس دعوے پر کافی بحث کی جا رہی ہے، تاہم آخر میں ان کا دعوی درست ثابت ہوا۔ فواد چوہدری نے اپنے بیان میں کہا تھا کہ ہفتہ کے روز چاند دوربین سے واضح طور پر دیکھا جا سکے گا اور عید 24 مئی کو ہو گی۔

دوسری طرف مرکزی رویت ہلال کمیٹی کی جانب سے فواد چوہدری کے بیان پر سخت رد عمل ظاہر کیا گیا اور کہا گیا کہ اعید کے ہونے یا نہ ہونے کا فیصلہ رویت ہلال کمیٹی کے اجلاس میں کیا جائیگا۔ اجلاس سے خطاب کرتے ہوئے مفتی منیب الرحمن نے یہاں تک کہہ دیا کہ وفاقی وزیر سائنس اینڈ ٹیکنالوجی فواد چوہدری پر پابندی لگنی چاہئے۔ انہوں نے کہا کہ فواد چوہدری کو چاہئے کہ وہ اپنی وزارت تک محدود رہیں۔

واضح رہے کہ ہندوستان اور بنگلہ دیش میں سنیچر کے روز چاند نظر نہیں آ سکا لہذا ان دونوں ممالک میں عید الفطر 25 مئی بروز پیر کو منائی جائے گی۔ ادھر، خلیجی ممالک میں عید کل 24 مئی کو ہوگی۔

    Published: 23 May 2020, 11:24 PM