یوشیہیدے سوگا جاپان کے نئے وزیراعظم منتخب، مودی نے دی مبارکباد

آبے نے کہا، ’’اقتدار میں رہتے ہوئے میں نے ہر دن پوری کوشش کی ہے کہ ملک کی معیشت کو دوبارہ پٹری پر لایا جائے اور جاپان کے حقوق کے تحفظ کے لئے ہر ممکن سفار قدم اٹھائے جائیں۔‘‘

تصویر سوشل میڈیا
تصویر سوشل میڈیا
user

یو این آئی

ٹوکیو: جاپان میں برسراقتدار لبرل ڈیموکریٹک پارٹی (ایل ڈی پی) کے لیڈر یوشیہیدے سوگا کو بدھ کو روایتی طور پر ملک کا نیا وزیراعظم منتخب کر لیا گیا۔ جاپان کی پارلیمنٹ کے ایوان زیریں میں ہوئے الیکشن میں ارکان پارلیمنٹ نے 71 سالہ سوگا کو اپنا نیا رہنما منتخب کیا۔

اس سے پہلے خراب صحت کی وجہ سے اپنا عہدہ چھوڑنے والے جاپان کے وزیراعظم شنزو آبے اور ان کی کابینہ نے بدھ کو سرکاری طور پر استعفی دے دیا تھا۔ اس کے ساتھ ہی آبے کے قریب آٹھ سال لمبے ریکارڈ دور اقتدار کا بھی خاتمہ ہوگیا۔

جاپان کے نئے وزیراعظم سوگا نے ملک کی معیشت کو پھر پٹری پر لانے کے لئے آبے نومکس کے نام سے مشہور معاشی پالیسی سمیت آبے کی دیگر پالیسیوں پر عمل کرنے کا عزم کیا ہے۔ آبے نے آج وزیراعظم دفتر میں اپنے دور اقتدار کے آخر دن ملک کے عوام کا شکریہ ادا کیا۔

آبے نے اس موقع پر کہا، ’’اقتدار میں رہتے ہوئے میں نے ہر دن پوری کوشش کی ہے کہ ملک کی معیشت کو دوبارہ پٹری پر لایا جائے اور جاپان کے حقوق کے تحفظ کے لئے ہر ممکن سفار قدم اٹھائے جائیں۔‘‘ آبے نے کہا ہے کہ وہ پارلیمنٹ رکن کے طور پر نئی حکومت کی حمایت کرتے رہیں گے۔ سوگا کے سامنے ملک کی معیشت کو پٹری پر لانا ایک بڑا چیلنج ہوگا۔ کورونا وائرس (کووڈ 19) وبا کی وجہ سے جاپان کی معیشت کی حالت کافی خراب ہے اور وہ تاریخی طور پر نچلی سطح پر ہے۔

واضح رہے کہ آبے نے 28 اگست کو خراب صحت کی وجہ سے اپنے عہدے سے استعفی دے دیا تھا۔ اس سے پہلے سال 2007 میں بھی انہوں نے صحت وجوہات سے استعفی دے دیا تھا۔ سال 2012 کے الیکشن میں آبے بھاری اکثریت کے ساتھ پھر سے اقتدار میں لوٹے تھے۔

آبے کافی وقت سے آنتوں کی بیماری ’السریٹیو کولائٹس‘ سے متاثر ہیں۔ یہ بڑی آنت کی ایک شدید بیماری ہے، جس سے آبے بچپن سے ہی جوجھ رہے ہیں۔ اس بیماری میں بڑی آنت کی اندرونی پرت میں سوجن اور جلن ہوجاتی ہے جس سے کئی چھوٹے چھوٹے چھالے بننے لگتے ہیں۔ ان چھالوں اور سوجن کی وجہ سے پیٹ سے متعلق پریشانیاں شروع ہونے لگتی ہیں جو نظام انہضام پر برا اثر ڈالتی ہیں۔ اس سے آنتوں اور ریکٹم کا کینسر ہونے کا خدشہ بھی ہوتا ہے۔ آبے کا دور اقتدار ستمبر 2021 میں ختم ہونے والا تھا۔ ان کے نام سے سب سے لمبے وقت تک جاپان کا وزیراعظم رہنے کا بھی ریکارڈ ہے۔

وزیراعظم نریندر مودی نے سوگا کو جاپان کا نیا وزیراعظم منتخب کیے جانے پر مبارکباد دی ہے اور دونوں ملکوں کے درمیان تعلقات کے اور زیادہ مضبوط ہونے کی امید ظاہرکی ہے۔ مودی نے ٹوئٹ کیا،’’جاپان کا نیا وزیراعظم منتخب کیے جانے پر یوشیہیدے کو مبارکباد۔ مجھے امید ہے کہ ہم مشترکہ طورپر مل کر ہندوستان اور جاپان کے درمیان خصوصاً اسٹریٹجک اور عالمی شراکت داری کو نئی بلندیوں پر لے جائیں گے۔‘‘

next