برطانیہ میں مسلم طلباء کے لیے ’اصولِ تکافل‘ کے تحت شریعت پر مبنی تعلیمی مالی معاونت پر کیوں ہو رہی بحث؟

برطانیہ میں اعلیٰ تعلیم حاصل کرنے کے خواہش مند مسلم طلباء کے لیے ایک نئے قسم کی تعلیمی مالی معاونت کی تیاری کی جا رہی ہے۔ برطانیہ کی کئی اہم یونیورسٹیاں اپنے طلباء اور درخواست دہندگان کو حکومت کی مجوزہ ’آلٹرنیٹو اسٹوڈنٹ فنانس‘ (متبادل تعلیمی مالی معاونت) اسکیم کے بارے میں معلومات فراہم کر رہی ہیں۔ اس اسکیم کے تحت طلباء کو ایسا تعلیمی قرض فراہم کرنے کی تیاری ہے، جس پر روایتی قرض کی طرح سود ادا نہیں کرنا ہوگا۔ اس کے بجائے طلباء سے ایک مقررہ رقم بطور تعاون وصول کی جائے گی، جسے مستقبل میں اسی اسکیم کے تحت دیگر طلباء کی تعلیم پر خرچ کیا جائے گا۔ اس پہل کا مقصد ان مسلم طلباء کے سامنے موجود مالی پریشانیوں کو ختم کرنا ہے، جو مذہبی عقائد کی وجہ سے سود پر مبنی قرض لینے سے گریز کرتے ہیں۔ اس اسکیم کو لے کر برطانیہ میں سیاسی بحث بھی شروع ہو گئی ہے۔ بعض رہنماؤں کا الزام ہے کہ اس سے تعلیمی نظام میں 2 طرح کے مالیاتی نظام قائم ہو جائیں گے۔ حالانکہ حکومت کا کہنا ہے کہ یہ کسی مخصوص برادری کو خصوصی فائدہ پہنچانے کی اسکیم نہیں ہے، بلکہ تعلیم تک رسائی آسان بنانے کے لیے ایک متبادل فراہم کرنے کی کوشش ہے۔

اس اسکیم کی بنیاد اسلامی مالیات کے اصول ’تکافل‘ پر مبنی ہے۔ تکافل کا مطلب اجتماعی تعاون اور ایک دوسرے کی مالی مدد کرنا ہے۔ اس نظام میں لوگ ایک مشترکہ فنڈ میں رقم جمع کرتے ہیں، جس کا استعمال ضرورت پڑنے پر گروپ کے دیگر ارکان کی مدد کے لیے کیا جاتا ہے۔ مجوزہ نظام کے تحت حکومت طلباء کی ٹیوشن فیس اور رہائش و کھانے پینے جیسے اخراجات کے لیے مالی معاونت فراہم کرے گی۔ عام تعلیمی قرض کی طرح طلباء اپنی تعلیم کے دوران اس رقم کا استعمال کر سکیں گے۔ تعلیم مکمل کرنے اور آمدنی شروع ہونے کے بعد انہیں مقررہ ضابطوں کے مطابق ادائیگی کرنی ہوگی۔ حالانکہ اس میں ایک اہم فرق ہوگا۔ عام تعلیمی قرض میں سود سے حاصل ہونے والی رقم حکومت کے عمومی مالیاتی کھاتے میں جمع ہوتی ہے، جبکہ اس اسکیم کے تحت طلباء سے وصول کی جانے والی رقم ایک الگ فنڈ میں رکھی جائے گی۔ اس رقم کا استعمال مستقبل میں اسی اسکیم سے وابستہ دیگر طلباء کو مالی معاونت فراہم کرنے کے لیے کیا جائے گا۔ یعنی یہ نظام سود کے بجائے اجتماعی مالی مدد کے اصولوں پر مبنی ہوگی۔ حکومت کا دعویٰ ہے کہ طلباء کو ملنے والی مالی مدد اور طلباء سے واپس لی جانے والی رقم روایتی اسٹوڈنٹ لون کے برابر ہوگی۔ ادائیگی کی تاریخ اور شرائط بھی مساوی رکھنے کی تجویز ہے۔

برسٹل یونیورسٹی نے اسے اسلامی مالیاتی اصولوں کے مطابق سود سے پاک سرکاری تعلیمی قرض کے طور پر بتایا ہے۔ لیڈز یونیورسٹی نے بھی 2026-27 تعلیمی سال کے دوران اس کی دستیابی کے امکان کا ذکر کیا گیا ہے۔ وہیں یو سی ایل اور سٹی سینٹ جارجز نے بتایا کہ مجوزہ فنانس سود پر مبنی نہیں ہوگا۔ حالانکہ اس کا مطلب یہ نہیں ہے کہ یہ یونیورسٹیاں خود طلباء کو الگ سے قرض دے رہی ہیں۔ یہ برطانوی حکومت کا منصوبہ ہے اور اس کے آپریشن میں اسٹوڈنٹ فنانس انگلینڈ اپنا کردار ادا کرے گا۔ مسلم طلباء کو مد نظر رکھتے ہوئے اس منصوبے کو تیار کیا گیا ہے، جو سود پر مبنی قرض لینا نہیں چاہتے ہیں۔ لیکن برطانوی حکومت کے مطابق کوئی بھی انڈرگریجویٹ طالب علم جو اہلیت کے معیار کو پورا کرتا ہے، وہ اس کے لیے درخواست دے سکتا ہے۔ یعنی یہ سہولت صرف مسلم طلباء تک محدود نہیں ہوگی۔ حکومت کا کہنا ہے کہ اس انتظام کو اپنانے والے طلباء کو نہ تو کوئی اضافی مالی فائدہ ملے گا اور نہ ہی انہیں کسی طرح کا نقصان ہوگا۔ انہیں روایتی اسٹوڈنت لون لینے والے طلباء کے مساوی ہی مالی امداد ملے گی اور ادائیگی بھی اسی تناسب سے کرنی ہوگی۔

برطانیہ میں اس منصوبے کی ضرورت کو سمجھنے کے لیے مسلم طلباء کی مالی اور مذہبی خدشات کو پیش نظر رکھا جا رہا ہے۔2021  میں مسلم سینسس کی جانب سے تقریباً 39 ہزار برطانوی مسلمانوں کے درمیان کرائے گئے ایک سروے میں یہ بات سامنے آئی تھی کہ 80 فیصد مسلم طلباء عام تعلیمی قرض لینے کے حوالے سے تذبذب کا شکار ہیں۔ وہیں 71 فیصد افراد نے اس بات کو تسلیم کیا تھا کہ موجودہ نظام مسلم طلباء کے ساتھ امتیازی سلوک کرتا ہے۔ حالانکہ اس معاملے پر مسلم برادری کے اندر بھی اتفاق رائے نہیں ہے۔ بعض اسلامی علماء کا ماننا ہے کہ برطانیہ کے موجودہ اسٹوڈنٹ لون نظام سے فائدہ اٹھانا مذہبی اعتبار سے قابل قبول ہو سکتا ہے۔ کیمبرج یونیورسٹی بھی طلباء کو یہ معلومات فراہم کرتی ہے کہ عام تعلیمی مالی معاونت کے نظام کو یو کے فتویٰ کونسل کی حمایت حاصل ہے۔ اس کا مطلب ہے کہ تمام مسلم طلباء روایتی تعلیمی قرض کو ایک ہی نظر سے نہیں دیکھتے۔ نئی اسکیم ان طلباء کے لیے متبادل فراہم کرنے کی کوشش ہے، جو سود سے متعلق مذہبی خدشات کی وجہ سے موجودہ نظام کا حصہ نہیں بننا چاہتے۔

اس تجویز کے حوالے سے برطانیہ میں سیاسی مخالفت بھی سامنے آئی ہے۔ ریفارم یو کے کی تعلیمی ترجمان سویلا بریورمین نے اسے دوہرا تعلیمی نظام قائم کرنے والی اسکیم قرار دیا ہے۔ ان کا استدلال ہے کہ مذہبی بنیاد پر الگ مالیاتی نظام تیار کرنے سے معاشرے میں اختلاف بڑھ سکتا ہے۔ وہیں برطانیہ کا محکمۂ تعلیم ان الزامات کو مسترد کرتا ہے۔ حکومت کا کہنا ہے کہ اس اسکیم کے تحت مسلم طلباء کو کوئی خصوصی مالی رعایت نہیں ملے گی۔ اس کا مقصد صرف ان لوگوں کو اعلیٰ تعلیم کے مواقع فراہم کرنا ہے، جو مذہبی وجوہات کی بنا پر سود پر مبنی قرض نہیں لینا چاہتے۔ ایک دوسرا سوال سرکاری خزانے پر پڑنے والے بوجھ سے بھی متعلق ہے۔ عام تعلیمی قرض کے معاملے میں بڑی تعداد میں طلباء پوری رقم واپس نہیں کر پاتے۔ سرکاری اندازوں کے مطابق تعلیمی قرض کی ایک بڑی رقم مکمل طور پر واپس ملنے کا امکان نہیں رہتا۔ نئی اسکیم میں بھی اگر طلباء پوری رقم ادا نہیں کر پاتے ہیں تو اس کی مالی ذمہ داری بالآخر حکومت اور ٹیکس دہندگان پر آسکتی ہے۔

اس منصوبے کو فروغ دینے کے لیے برطانوی حکومت نے اسلامی مالیاتی کونسل برطانیہ کو 3.65 لاکھ پاؤنڈ سے زیادہ کی رقم دی ہے۔ منصوبے کو اسلامی مالیاتی اصول کے تعمیل کی تصدیق کے لیے ایک آزاد اسلامک فنانس سپروائزری بورڈ بھی تشکیل دیا گیا ہے۔ فی الحال منصوبے کے آغاز کی کوئی حتمی تاریخ کا اعلان نہیں کیا گیا ہے۔ برطانوی حکومت نے اسے نئی لائف لانگ لرننگ انٹائٹلمنٹ نظام سے جوڑا ہے۔ حکومت کے مطابق یہ نئے مالیاتی نظام کے نفاذ کے بعد آلٹرنیٹو اسٹوڈنٹ فنانس کو جلد از جلد شروع کیا جائے گا۔ ایسی صورتحال میں یونیورسٹی کی ویب سائٹس پر معلومات دستیاب ہونے کے باوجود طلباء کو اس کی درخواست کے آغاز سے متعلق سرکاری اعلان کا انتظار کرنا پڑے گا۔